E na o le valu tausaga o Exodus Lale mai Sunnybank Brisbane ae o le mataina o lona Leo ma le agavaa I le faatinoina o le vaega a Simba I le tala faakoneseti iloga a le Lion.King lea ua filifilia ai nei e le kamupani a Walt Disney.
O leisi alo o Samoa ia Nick Afoa ua loa na filifilia e tauaveina le vaega a Simba matua ma ua toalua ai nei alo o Samoa I lenei faafiafiaga ua numera tasi i le lalolagi ma na tumutumu ai maimoaga i le Opera House i Sini.
Na faaalia e le pulega(agent) a Exodus Lale le Afioga Tagaloa Jerry Lale o le Kemps Law, o se miti ua taunuu le filifiliina o Exodus mai le toatele o tamaiti Ausetalia mo lenei faaaliga.
E le gata o le siitia ai o le igoa o Samoa aepeitai ua avea lea ma pine faamau o le taua o le soifuaga faasamoa e aoaoina ai fanau laiti aemaise le ola faaleagaga.
O le alii o Exodus e talenia Tele i siva Samoa ma e fiafia lava foi i le aoga aso sa ma tala tusi paia i totonu o la latou lotu i Sunnybank Uniting.E le gata I le ta piano e taalo foi i le aulakapi liki a Acacia Ridge Sunnybank i le tulaga o le hooker.
Saunoa foi nai ona matua ia Faalafi Tino Lale mai Apolima,Vaiusu ma Safune faapea le Tina ia Nicola mai Sinamoga ma Satupaitea, o Exodus o se atalii usitai toe filemu ma e viia le alii i nei faamanuiaga.
O se mitamitaga foi lea i nai matua o matua le afioga Faalafi Sa’u ma le faletua a o faamanatu e le aiga faavauvau le tolu tausaga talu na amia le toatele o nisi o le aiga i le afi Tele na maliliu ai i le 2011.
O le toatele o tausoga o Exodus na feola faatasi mai ma tafafao ma ia lea na maliliu i lenei afi matautia ma o se taimi faagalogata o loo aualofa iai Exodus ma teufatu i lona agaga.
