Matagofie siufofoga mafutaga talavou sauniga faapitoa a le Katoliko

O le faailoga o le 800 tausaga talu ona faatuina le ituaiga o le St Franciscan Friar poo Sagato Falanisisi Felela i le lalolagi, sa faataunuuina ai se sauniga tele i le malumalu Katoliko St Patrick Cathedral i le aai o Aukilani, i le Aso Toonai na mavae atu nei.
O le autalavaou a le Young Peoples Fellowship sa valaaulia e peseina viiga o le Atua i lea sauniga tele a le Ekalesia a le Katoliko.
Ua lauiloa lenei mafutaga talavou i totonu o Aukilani faapea foi i le Ekalesia, ona o le faaaogaina o latou ola talavou mo le finagalo paia o le Atua, e ala atu lea e le gata i pesega, siva faatalalelei, tala faatino ma nisi o taleni o le autalavou faaonapo nei. Sa molimauina le matagofie o a latou pesega ma siufofoga i lena po o le sauniga.
O le afioga ia Bishop Robin Leamy sa ia taitaiina le sauniga lea na potopoto uma ai le toatele o tagata mai i atunuu eseese aemaise ekalesia eseese a le Katoliko i totonu o Aukilani.
Sa saunoa le taitaifono o le autalavou, o Asi Peter Pa‘u, o lenei autalavou o loo tatala i soo se talavou lava e le na o Samoa.
“E tele foi polokalame o loo faagasolo nei e fesoasoani ai mo tupulaga talavou i tulaga tau le aoaoga”.
O le Young People’s Fellowship o loo tuu faatasi ai alo talavou mai ekalesia eseese a le Katoliko i totonu o Aukilani Tutotonu.
O le masina o Iulai o le tausaga nei lava, sa faalauiloa ai le tatalaina aloaia o le latou lipine cd o pesepesega ma viiga o le Atua e pei ona faalauiloa i luga o le Samoa Times.
O le sini faamoemoe a le Young People’s Fellowship pei ona faailoa mai e le peresetene, ia tautuaina le Atua e ala i taleni faapea foi ma le faatinoina o galuega fesoasoani mo tagata i auala eseese, i maota gasegase, falepuipui, nofoaga o tagata matutua, soo faatasi a autalavou, tapuaiga ma le tele o isi galuega lelei o loo latou faatinoina ai latou polokalame.