Ina ua amata tulai mai le mataupu i le faaseā i le All Blacks i le foliga vaai maualalo ia Samoa ma isi motu o le Pasefika i le taaloga o le Lakapi aemaise o Samoa lava le motu o le Pasefika ua tele sona sao i le ‘au lenei le All Blacks i tausaga e tele, na amata vevesi i le malaga taamilo a le All Blacks lea na malaga atu ai i Amerika taaalo ai ma Amerika faasolo ane ai i le atu Europa, pei o i tonu lava na lagalagā ai finagalo o le lautele, atoa ai ma le taotaomia umi o tama taaalo Samoa i konekarate ma tulafono lē fetaui a le IRB le Iuni faatamā o le lakapi a le lalolagi.
Pei ua avea le vevesi lea ma mafuaaga ua fanau mai ai se taaloga faitaulia a le Manu Samoa ma le All Blacks ia Iulai o le tausaga nei. E lei leva atu nei na to‘ai taunuu ai i Samoa se faigamalaga o nisi na malaga atu mai Niu Sila e toe asia nisi o vaega na faatalosaga ina ia toe faaleleia mo le saogalemu o tama taaalo.
Ua toe taliu i Niu Sila le faigamalaga ua faafiafiaina i tapenaga o le malae mo lea faamoemoe, ma ua molimauina foi e le tusitala a le Samoa Times ina ua asia Samoa i le vaiaso talu ai, le matagofie o le sauniuniga a Samoa ma le galuega o le toe faaleleia o le malae lakapi faavaomalo i le Apia Park.
I le taimi nei o loo faasolosolo pea le faaleleia o le malae, ma o le isi vaega matagofie o lenei malae i Samoa, o le a mafai ona faia ai ni taaloga i le po. Masalo o Samoa foi se uluai motu o le Pasefika o le a matuai mautu lona malae e fua i isi o ona tuaoi Pasefika.
Talosia ia mae‘a ane le taaloga a le Manu Samoa ma le All Blacks ae vaovao mai nisi au lakapi mai isi atunuu o le lalolagi e fia malaga taamilo atu i Samoa.
