Sa molimauina le faatumulia o le falesa a le Ekalesia Katoliko i Magele i le Aso Sa ananafi 19 o Oketopa i matua faapea le aumalaga mai Safotu, aemaise o le ofisa mamalu i Malaeola le susuga i le peresetene ia Afuamua Seve, ma le sui peresetene le afioga ia Maiava Setefano, o le ofisa aoao o le Aoga Aso Sa le peresetene ia Mataitaua Faalenuu, teutupe ia Tila Maninoa faapea Sister Pelenatete Peni.
Ae le gata i lea o matua ma uo na faatasi atu e molimau lenei sauniga faapitoa. O le afioga ia Patele Felise Lemi o loo tausia lenei Matagaluega ma o ia foi sa taitaia le sauniga.
Na muamua lava i le taulaga o le Misasa Paia, ona sosoo ai lea ma le faaevagelia a le aumalaga mai Safotu ma faaiu ai le osigataulaga ae faagasolo le polokalame a le fanau.
E taga eseese lava le Aso Sa, e uiga eseese foi le faatinoina ma le faaaogaina o le taleni a le fanau ua tuuina iai e le Atua, aua o le aso lea ua tatala ai le faitotoa e molimau ai fanau e ala ia latou tauloto faatasi ai ma faatinoga.
Sa molimauina le talenia o alo ma fanau i le faatinoina o tala ma siva aemaise ai o latou tauloto. Na amata i fanau laiti, ma faasolo ai vasega matutua.
O upu e masani ai matua a aoao le tama e tusa ma ona ala e oo ina matua e le toe tea ese ai lava. O le vaaiga lea sa maitauina i fanau laiti, i le tai 2 tausaga ma le 3 tausaga, o le manino ma le lelei o le tautala i le gagana Samoa e molimau ai lo latou sao i le faalogologo a matua ma aiga sa auai.
O se molimau ola e toe fafagu ai i matua le taua o le aoao o le taimaititi ao laititi i le gagana Samoa ma le faitauina o le Tusi Paia. O le susuga ia Penitito Kapeli sa faasoasoaina le polokalame o le aso faatasi ai ma le fesoasoani a le susuga i le taitai ia Tia Joe.
O se tasi vaaiga taua sa iai i lea aso o le galulue faatasi o faiaoga Aso Sa ma matua i le vaaiga o tamaiti, e uma ona faatino aitema a vasega taitasi ona gasolo lea e fai le vai taumafa i le nofoaga o loo iai matua, o se luitau tele ma se vaaiga lelei mo le fanau.
Sa faapea foi ona faatauina ai ma le sosisi aua lava le sailia o se seleni mo le faaleleia o nisi vaega o le galuega a le Atua.
