Ole Parklands Function Centre na faatino ai ile po ole Aso Toonai, le Luau ole Kirisimasi ale Fono Aoao a Tagata Samoa i Sini, e taualuga ai ana polokalame ole 2016, ma na faatumulia ma fiafia ai le tusa ma le 300 tagata sa auai. Sa amatalia le faamoemoe ise tatalo na saunia ele susuga Rev Iakopo Leleimalefaga e faafetaia ai le agalelei ole Atua ua taualuga polokalame o lenei tausaga.
Ole afioga Tiumalumatua Su‘a na fai ma fofoga ole po ae ole faaili mālie ale Exodus Band na faafiafia ma lē motu ai le sisiva ole aofia. E pei ona silafia ose tasi lenei o faamoemoe ole Fono aoao e amatalia ai le faaputuga seleni auā se Maota Samoa i Sini nei mo le Fono ma faaaogāina i mea e fai a Ekalesia, Faalapotopotoga ma Mafutaga a Nuu i Sini nei.
Na saunoa le afioga ile Peresetene, ole sini autu ia amata atu nei ma faaauau e isi nofoaiga lenei faamoemoe ua ausia e Aukilani, Perisipeni ma ua fuafua iai Canberra, auā e lē misi se vaiaso ma faaipoipoga, aso fanau, sailiga seleni ma Siva Samoa oloo totogi ai e tatou tagata tupe e tele i isi nofoaga ma atunuu ese, ae lē nofo le seleni mo lo tatou lava lotoifale e atinae ai.
Sa faatino foi le talimalo ale Fono aoao a tagata Samoa i Sini mo ana valaaulia e ala ise taumafataga mamafa toe felanulanuai e taualuga ai le tausaga i lenei Luau, ma na faamalieina ma vivii e tagata le manogi ma le lelei o tapenaga ole taligasua, o taumafa mai le sami, o manu mai le lafu, e aofia ai kuka eseese ma le taumafa suamalie, o keke, pai ma trifles.
Ose vaega tupe na maua ole a tului ai le saofaga ole Maota Samoa lea ua amata tapena talu le faavae mai ole Fono Aoao ile 1986.
Ose vaega mataina ole fiafia na valaaulia ai foi le susuga ile alii pese ia Richard Parker ma faafiafia ai a‘o silamiō ma sisiva le aofia.
Ose tasi lenei o lamepa i pesepesega a Samoa ile taimi nei ma ole mafuaaga lea ole valaaulia faapitoa ele Afioga ile Peresetene ma le laulau.
Sa tauaaoina atu foi ele Fono se meaalofa mo Richard Parker ma saunoa Rev Iakopo Leleimalefaga e faafetaia foi le lagolago ale aofia ma Parker ma faamanuia atili i lenei alii pese tausaafia.
