E alu atu aso ae sau foi aso, e sui lava foi faiga ma le faagasologa o le soifuaga a o mafutaga mafana a mātua ma fanau o se faamoemoe lava e matagofie ma maumaututu auā e tupu lauolaola ma lauusiusi pea aiga e ala i faamanuiaga a le Atua i fanau.
O le mafutaga a le tina ia Fiaoo Filoa Samaga Tanielu ua faatolu nei ona faataunuuina talu ona faavaeina mai, ma na saunoa le afioga i le teutupe o le mafutaga le susuga Leitulua Akelly o se mafutaga matuā matagofie lenei ona ua lē gata ina faaopoopoina le fuainumera o tagata na auai, ae o se mafutaga na sili foi ona tāua tele ona ua mafai ona mafuta mai i ai uso ma tuafāfine o si o latou tuaa le tamā ia Filoa Samaga Filoa.
O lea foi mafutaga sa faamanatuina faapitoa ai le 80 tausaga o le soifuaga o le tina ia Fiaoo Filoa ma o se fiafiaga sili lea i aiga ona ua mafuta ai ma aiga o le tamā ua fai i lagi le tuligasi‘a i le valaau paia a le Atua.
O le vaiaso atoa na faataunuuina ai lenei mafutaga i le aai o le YMCA Campsite i Hunua ma sa faatinoina lava le polokalame o le mafutaga e alo ma fanau a fanau o le tina ia Fiaoo faatasi ai ma le lagolago malosi a le laulau i le taitaifono le afioga ia Tafaoimalo Seiuli Uatisone Filoa, o le failautusi le susuga Toa Ulae Michael McCarthy aemaise foi o le teuoloa le susuga Leitulua Akelly.
O le mafutaga lona lua na faamauina ai e 94 tagata na auai o alo lava ia o le tina ia Fiaoo ma le tamā ia Filoa, ae o le tausaga lenei e 114 tagata na auai o lona uiga o loo faaopoopoina pea le fuainumera o faamanuiaga a le Atua i totonu o le aiga e ala i fanau.
O le faamoemoe lava o lenei reunion o le fia faamafuta atili pea lea o alo ma fanau ina ia mautinoa e malamalama ma manino lelei le sootaga o le isi i le tasi auā lo latou lumanai mo le nofo silafia e fanau ma mātua.
Toatele lava nisi na faimalaga mai vaega eseese o le kelope ona o le taupati mai i le fia mafuta aemaise lava o le faatāuaina o le fesootai ma le fia auai pea ina ia mafanafana atili mafutaga o le lumanai o le aiga.
Na faamae‘aina lenei mafutaga i le afiafi o le Aso Faraile ma ta‘ape ai loa ina ua mautinoa ua matuā lava le mafutaga ma ua maua le fiafia e tagata uma sa auai i le faamoemoe ma le talitonuga o le a toe maua se feiloaiga manuia i le isi reunion i le 4 tausaga o lumanai i le taitaiga ma le tausiga alofa a le Atua.
O le viiga e faafoi pea i le Atua soifua e toatasi auā o lona alofa ma lona agalelei lava lea ua manuia ai fuafuaga uma o lenei mafutaga. Saunoa foi le susuga i le failautusi o le mafutga le susuga Toa Ulae Michael McCarthy ma na faafetaia ai le paia ma le mamalu tele o aiga uma ona o le taupati mai e faataunuuina lenei faamoemoe tāua, sili foi la latou faafetai tele i uso ma tuafāfine o si o latou tuaa le tamā ia Filoa Samaga ona o le auai mai ua matagofie ai le mafutaga i lenei foi tausaga.
