O se tasi lenei o faatasiga poo aso faamanatu faitaulia i tagata uma o le Pasefika o loo alaala ma papaaao i Niu Sila nei aemaise lava i Aukilani.
O le faaiuga o le vaiaso na tea nei, na faamanatuina ai foi le Pasefika Festival poo le aso ua faapitoa mo le faalauiloaina o tu ma aganuu, o taleni eseese ma faiva alofilima a tagata o le Pasefika.
E le gata o se taimi fiafia mo uso uma ma tuafafine Pasefika e potopoto faatasi ai ma fefaaaliai a latou tu ma aga, o faiva alofilima ma soo se measina o loo tiu ai le Pasefika, ae o se taimi foi ua tulimataia pea e tagata tafafao maimoa mai isi atunuu o le lalolagi, e latou te molimauina ai le tutasi o nei tu ma aga faa-Pasefika.
Na lasi le maimoa a tagata, e fai o le matagofie felanulanuai o meataulima sa faaali, ae o faafiafiaga foi na faatino i nuu taitasi na vaevae i ai motu sa iai o latou sui i lenei aso faapitoa.
Ua pau tonu le Pasefika Festival o lenei tausaga ma le tu lalata atu i le aso e saili ai tulagatofi mo le Pulega Tele a Aukilani poo le Super City, lea foi la na matauina ai i lea aso, le faaaoga lelei e pulenuu o Manukau, Len Brown ma le pulenuu o Aukilani, John Banks o lea faatasiga, e feiloai atu ai i tagata uma o loo alaala i nei aai tetele e lua, auā lava a latou faiga filifiliga i se taimi e le o toe mamao, mo le tuufaatasia o nei aai tetele e avea ma aai e tasi.
Na molimauina i le nuu lava ia a Samoa, le lasi ma le matagofie o meataulima eseese sa faaalialia ai e le au faioloa, ma na matauina foi le fiafia o turisi e faatau le tele o nei oloa o loo mamanuina e tagata Samoa.
Sa iai foi nisi o le au faipisinisi na faimalaga mamao mai lava i Samoa ina ia auai i lenei aso faapitoa, ma e iai le talitonuga sa lelei foi sa latou seleni na maua mai ni faatau o lea aso.
Ua taape foi la lenei tumutumu ma na tapunia ma le talitonuga sa manuia le faatulagaga uma o lenei faamoemoe e pei ona sa talimalo ai le pulega a le aai a Aukilani.
