Masofa le faatuatuaga na ave i le leoleo sinia

O le faia o ni gaioiga faaalatua i se tulaga e atagia ai le taumafai e natia se solitulafono, o se tulaga e matuia tele i mata o le tulafono o soligatulafono mamafa.

O le mafuaaga foi lea o le aiaia o se faasalaga faafalepuipui mamafa mo i latou e solia ma faamaonia i se solitulafono faapea pe a oo ina suesueina e le faamasinoga maualuga a le atunuu.

O Malu o le Malo poo leoleo, o i latou ua tausimea a le Malo e ala i le puipuia ma le faamalosia o le tulafono. Peitai ua lē o le tulaga lea na faatino e Atonio Tausili ma nisi o tamaitai leoleo e toalua na molia ona o se gaioiga na lē mafai ai ona molia se alii na maua o ia umia ni sikaleti maruana se lua.

O Atonio Tausili sa umia le tulaga faaleoleo o se leoleo satini sinia, ae o tamaitai o Luisa Lototau, ma Heta Wilson o ni leoleo (police constables) sa galulue i le ofisa o leoleo i Faleata lea o loo i Tuanaimato. O le aso 26 o Tesema o le tausaga e 2013 poo le 11 i le taeao na oo atu ai se valaau mai se telefoni mai se aiga i Vaitele fou na manaomia ai se fesoasoani.

O se aiga e faapea na tulai mai se vevesi ona e faapea sa manaomia e se tina se galuega a leoleo e saili ai lona toalua sa faalafi e le tina o Maria i lona fale. O Atonio na taitaia le sifi i lea aso ma o ia foi na agai ma nisi leoleo faatasi ai ma le tamaitai leoleo o Heta e saili poo le ā tonu le mea ua tupu i le aiga na alu atu ai le valaau.

Na taunuu ona faia lea o le galuega ma mafai ai loa ona suesueina se tamaloa lea na maua o ia umia ni sikaleti maruana se lua. Na fautuaina e Atonio e tele sona aafiaga pe a oo le mataupu i ona tulaga e tusa ai ma aiaiga o le tulafono.

O tolaulauga a leoleo na faaalia ai na umia e le tamaitai leoleo o Heta sikaleti maruana na maua lea na ia fafao i le taga o lona ofu. Peitai sa valaau ane i ai le alii leoleo satini sinia e vaai i oo i le ofisa sikaleti.

O le taimi lea e pei ona faaalia i tolaulauga a leoleo i luma o le faamasinoga na vaaia ai le tamaloa na maua i ai sikaleti o alu ane ma se pisupo tolu pauna ma ni taamu vela ua tuu i le taavale a leoleo na o atu ai le alii satini sinia ma isi Malu o le Malo.

E leai se silafia o Atonio o loo faaauau pea ona oo sikaleti maruana i le ofisa. Fai mai ina ua taunuu na faapea ona agai atu le tamaitai leoleo o Heta ma faaali sikaleti maruana i isi leoleo o loo iai ma fai lana tala, sa faatonuina latou e le taitai ia aua ne‘i oo atu i le ofisa sikaleti.

Na iloa ane e le tamaitai leoleo o Luisa ma ia tago atu loa ma aumai ma agai i le faleui o le ofisa ma togi i le ipu ona ia falasi lea ma o atu ai na sikaleti i le lua. O i tonu na mafua ai loa ona suesueina le mataupu ma faia ai loa moliaga.

O le faaiuga a le faamasinoga na saunoa ai le afioga i le Faamasino Sili, o Patu Tiavaasue Falefatu Sapolu, ma ia faailoa le matuia tele o le solitulafono ua faia e i latou nei. Peitai na ia saunoa pe ana leai le faatonuga a Atonio e lē aafia tamaitai leoleo o Luisa ma Heta.

O le faasalaga e tatau ona iai mo le solitulafono na faia e Atonio, e sefulu tausaga i le falepuipui, ae o moliaga o le taumafai e natia le solitulafono, ma le aafia i ni faiga ua noatia ai le faia o le tiute o leoleo sa molia ai tamaitai leoleo e toalua e fitu tausaga i le falepuipui.

O le malepe o le faatuatuaga poo le breach of trust na ave i le leoleo satini sinia na saunoa le Faamasino Sili o se tulaga ma‘ale‘ale lea i le vaai a le tulafono ma ua talafeagai se faasalaga faafalepuipui.

Mo le moliaga o Atonio, na amata le fua mo sona faasalaga i le sefulu masina ae na aveesea le isi lima ona o itu lelei e pei o le ioe i le moliaga, ma le faatoa molia i se solitulafono. Na totoe ai le lima masina ua avea ma ona faasalaga.

O tamaitai leoleo e toalua sa la ioeina foi moliaga taitasi peitai ua faapafala se faasalaga e aunoa ma le faamaonia o o la moliaga. O se faaiuga na faaalia e le Faamasino Sili o le a toe maua ai se isi avanoa mo i laua e faaauau ai le la tautua o ni leoleo aemaise o le a maua ai ma se aoaiga lelei e toe fuataina ai o la olaga.

O nisi o tiute tauave masani o Malu o le Malo poo alii ma tamaitai leoleo i Samoa