Ua faamavae atu le atunuu ma le Malo i le ‘au a le Manu Samoa i lona alofaiva mo le Ipu o le Lalolagi i lenei tausaga. O se faamavaega puupuu na faia i le Maota o le Pulega o Tagata Tafafao Maimoa Mai i Fafo lea na fofogaina ai faamalosiau a le Sui Palemia, le Afioga Fonotoe Pierre Lauofo mo le ‘au a le atunuu i le agai atu ai i Egelani mo lea faamoemoe.
O le ‘au na faapea ona faalauiloa i le vaiaso na tea nei na laga ai finagalo o nisi faapea e lē o le ‘au atoa lea na filifilia i le taaloga ma le Olopeleki ae o le faamatalaga a le faiaoga taiulu o le ‘au ia Stephen Betham, o le ‘au lea ua vaavaai i ai le pulega ua talafeagai lelei lava ma sauniga o le Ipu o le Lalolagi.
O lea ua toe kapeteni le alii o Ofisa aaaevaranius lea na lavea i le taaloga ma le Olopeleki ae o lea ua ta‘ua ua toe foi i le manuia ma ua manatu le pulega e tuu ia te ia le taitaiga o le ‘au ma le fesoasoani a le alii o Alesana Tuilagi o le kapeteni lagolago.
O le lauga faamanuia a le atunuu ma le Iuni Lakapi na fofogaina e le Sui Palemia e pei ona faamanatu ai le afioga Fonotoe i le ‘au a le atunuu ia manatua le tapuaiga ma aua ne‘i galo e agai i le Atua faamoemoega uma a le ‘au ona manuia lea ae o le tapuaiga a Samoa e malosi pea ma faaauau mo ana tamafanau.
O le talosaga foi lea a le ‘au e pei ona saunoa i ai le Afioga Namulauulu Sami Leota i le faamavaega lea, e pei ona talosagaina ai le tapuaiga a le atunuu. O le po o le Aso Faraile lea na tuua ai loa Samoa ma ua agai atu i Niu Sila ma agai ai loa i Egelani lea e iai lana taaloga e tasi a o lei amata ai le tamilosaga o le Ipu o le Lalolagi.
O lea na tuufaatasia uma lava le ‘au a le atunuu ma amata ana taaloga o le ‘au atoa a le atunuu i Samoa nei a o lei tuua ai le atunuu ma e silia i le vaiaso lea na tuufaatasia ai le ‘au lea o le a tausinio mo lenei tamilosaga tele. Faaalia e le alii faiaoga taiulu e tolu lelei lava masina o le a tuua ai le atunuu e lana aulakapi tele faatoa toe foi mai ai i le atunuu.
Toe faafoi tama o le ‘au i o latou tupuaga
A o lei tuuvaa ese atu le ‘au a le atunuu mo le Ipu a le lalolagi, ae o se tasi o vaaiga mataina i ana tapenapenaga i Samoa, o se avanoa na ave uma ai tama o le ‘au mo se latou tolauapiga i le motu tele i Salafai.
E tolu aso na nonofo ai tama i Savaii ma faagasolo ai nisi o a latou toleniga i nofoaga maotua. E lē gata i le manaia o le mālū o le agi mai o le savili a o faagasolo a latou toleniga, ae o se avanoa na manatu le pulega a le ‘au, se‘i toe faafoi ai tama, aemaise foi tama ia ua leva ona lei toe iai se sootaga ma le olaga faasamoa moni, ina ua aumau i atunuu mamao.
O se vaaiga matagofie la le mafai ona latou auai atu ma nonofo faatasi i se olaga faasamoa moni, sa faatulaga foi a latou galuega ma feau faasamoa e pei ona masani ai tama ma taulelea Samoa i le fatuaiga tausi.
O nisi o meafai, e ono goto ifo ai i le lagona o le tama le olaga moni o lona tupuaga o se Samoa, o se isi foi metotia e atili maua ai le lototele ma le lototoa e faatino le taaloga pe a toe tepa ma mafaufau mai le olaga faigata i Samoa, ona atili ai lea ona finau ina ia manumalo ma faaeaina mai lea olaga faigata o loo faatino ma tapuaia atu ai o latou faiva e nai o latou mātua, ma aiga i Samoa.
Sa mafai e tama o le ‘au ona fai feau e pei o le tapenaina o se suavai (umu), vavalu ulu ma talo, o isi e pusa le umu, o isi e valu le popo, o se vaaiga sa seāseā ona iai muamua i ni tapenaga a le Manu Samoa i isi ata taaloga mo Ipu o le lalolagi ua mavae atu.
Faaafe Iuni Lakapi Aukilani Samoa i le taunuu mai o le Manu Samoa i Aukilani
CASCNa afea Aukilani e le ‘au a le atunuu i lana malaga mai e agai atu i Lonetona, le atunuu o le a faagasolo ai taaloga o le taamilosaga mo le Ipu o le Lalolagi a le Lakapi i lenei tausaga 2015.
Ona a‘e ai lea o se tofa i le afioga i le faatamā o le Iuni Lakapi a le Aukilani Samoa, ia Lui Tautolo atoa ai ma le afioga ia Aiolupotea John Roache le Peresitene o le Iuni Lakapi a Aukilani Samoa, e faia se faaafe a le Iuni Lakapi a Aukilani Samoa mo le ‘au a le Manu Samoa a o iai i Niu Sila mo ni nai aso.
O le taunuu mai o le Manu Samoa i lea afiafi ua pa‘ū tonu mai lava i lona aiga i Niu Sila, o loo pulea ma faafoeina e tamalii foi o Samoa ae auga lava e tasi mo Samoa ma le lumanai.
O tulaga masani lava sa faataunuuina i lea po; na muai sii le taulaga faafetai i le Atua ina ua fevaaiXXXavai o Samoa i nei faagatama o le Lakapi.
E manatua pea i tatalo le faamoemoe ina ia a‘e manuia faiva ma faafiafiaina ai Samoa i soo se tafa o le lalolagi. Na mae‘a lea ona faasolo loa lea o siva a tama taaalo pulega faapea foi le sao o le afioga ia Patele, Konesula, le Faatamā o le Iuni lakapi a Aukilani Samoa, atoa ai ma le afioga i le Peresitene ia Aiolupotea ia latou sausaunoaga i siva Samoa i le po, ma maua ai le aofaiga o le seleni e $9,500 na tuuina atu i le pulega o le ‘au e fesoasoani ai i le malaga.
Sa faatumulia le nofoaga i lea afiafi ma vaaia foi le fiafia o le tapuaiga a Samoa ina ua feiloai atu i alii ma tama taaalo i lea po.
Sa taualugaina le faaafe i lea po i sina seleni sa faimeaalofa ai le Aukilani Samoa ma le Atunuu o Samoa i lea po e fesoasoani ai i fuafuaga a le Manu Samoa i le taimi e moomia ai.
Polokalame o taaloga a Samoa e faatulagaina e faapea:
1 Taaloga 7 (o le taamilosaga)
Samoa vs USA
2 Taaloga 17 (o le taamilosaga)
Aferika i Saute vs Samoa
3 Taaloga 24 (o le taamilosaga)
Samoa vs Japan
4 Taaloga 34 (o le taamilosaga)
Samoa vs Scotland
O se vaaiga lena i le faasologa o taaloga lava ia a Samoa e ese mai i isi taaloga o loo talamaea ai i lenei taamilosaga. O lea ua toe 24 nei aso o loo totoe ona amataina aloaia lea o nei taamilosaga.
Talosia ia le alo atu o au tamafanau ia latou taaloga, ina ia taalo malosi, auā se ‘ai mo Samoa ma lana tapuaiga.
