Masii le Manu Samoa 7 e tatau ona manumalo

Ua tuanai atu taumafaiga sa auai le au lakapi taitoafitu a le Manu Samoa ma ua le faamanuiaina ma ua maualalo ai lona tulaga. Na tautino le sui taitaifono o le Iuni Lakapi a Samoa le tofa Lefau Harry Schuster, o le lua tausaga ua mavae e oo mai ile tausaga nei ua fai si faaletonu o faaiuga o tausinioga sa auai le au lakapi fitu a le atunuu. O lona uiga e pei ona saunoa le sui taitaifono e faalaei’au ile au ua filifilia mo le taamilosaga masani a le pulega o le lakapi i le lalolagi, e tatau ona taumafai le ‘au e siitia lona tulaga.  O le saunoaga a le sui taitaifono na ia faailoa ai e poo le a le maua o le malosi o le tino e tama taaalo, e poo le a foi le lelei o le mafaufau i le faatinoga o le taaloga, ae a leai se loto iai e le maua le sini o tapenaga.

E lagolagoina e le Pelesetene o le Iuni lakapi a Samoa le tofa Tuiloma Pule Lameko le finagalo o le sui taitaifono. i lana foi saunoaga i le faamavaega ma le ‘au, na ia tuusa’o ai sana faasea i le ‘au. Na saunoa Tuiloma ma ia faaalia e ao ile ‘au ona latou silafia o loo iloa uma atu e le atunuu faaletonu o loo lape ai i taimi o a latou taaloga. “O le isi mea a oo ina rug le polo ona sau lea i tua o le polo ae leai se isi o tatou o iai, aisea e tupu soo ai lea faaletonu”.

O le alii faia’oga ulu le susuga Damien Macgrath sa saunoa e fai ma sui o le ‘au ma ia faailoa o lona talitonuga atoatoa ua iai lea ile ‘au ua ia filifilia ma lana faiaoga lagolago. O lana tala ua matua lelei tapenaga e ui ina sa iai ni faaletonu ile taamilosaga a le Oceania na saili ai se avanoa o Samoa i le Olimipeka.

O se taamilosaga e lei maua ai se avanoa ae ua faatali ile isi tausinioga ile tausaga fou pe faamata e maua ai se avanoa o Samoa. O le taitai malaga le afioga Tupuola Masunu Talapusi Tuisila, na ia faailoa ua iai uma tapenaga mo alauni ma isi alagatupe mo le malaga atu o le au taitoafitu a le Manu Samoa.

O lana tatalo ile atunuu ia mau pea le toovae o le tapua’iga ile lagolago atu pea i taumafaiga a alo ma tama fanau aemaise o le iuni lakapi a le atunuu.