Ua aave tala i le malosi o le aulakapi a Malisi i Aukilani, lea o loo latou umia le siamupini o le taamilosaga 15 a le Aukilani Samoa faatasi ai ma le siamupini o le taitoafitu a Fiti o le Tailevu i le masina ua mavae.
O le suipi ai o Malisi i lenei tausaga i taaloga lakapi ua filifilia mai ai alo ma tamafanau o le atunuu faatasi ai ma tamaiti Fiti ma Tonga o loo auai i lenei kalapu, e tauaveina le fu‘a a Malisi i Niu Sila nei i le taitoafitu a Malisi Samoa lea e faatinoina i le aso 19 ma le 20 o le masina lenei o Fepuari.
Ua tele tausaga o malaga Malisi Aukilani i le faamoemoe lenei i Samoa ae lei faamanuiaina ai lava, ae na saunoa le afioga i le taitai malaga poo le Manager ia Lemalu Ben, e iai lona talitonuga ua lava tapena le ‘au mo le masii atu i Samoa mo le taamilosaga lenei, ma o se taamilosaga tāua foi lea i le talafaasolopito a le Pasifika i taaloga lakapi.
O le po o le Aso Faraile na faapaia ai le togiga fou a le ‘au i le hall a le Ekalesia Katoliko i Onehunga. Sa auai aiga uo ma ē masani faapea ulu o kamupani o loo latou lagolagoina le ‘au i lea sauniga tāua.
O le afioga ia Patele Falaniko na taitaiina le polokalame i le sauniga lotu faatasi ai ma le tatalo o le faapaiaina o le togiga, ona saunoa lea o le Peresetene o le ‘au le afioga ia Leota Isaako e faailoa suafa o i latou e to‘atolusefulu o le a malaga atu i Samoa.
Na sosoo ma le taumafataga ona saunoa lea o le afioga i le Konesula o Samoa ia Faolotoi Reupena Pogi, o se tasi o tama tuai o Malisi e fai ma sui o le auvalaaulia ma aiga aemaise o tama tuai o Malisi e momoli le faamanuiaga mo le ‘au auā le masii atu i le atunuu.
Na apoapoai le Konesula, ia taalo ma le malosi ina ia maua se ‘ai ma ia taalo tausaafia; a malolo ia malolo faatamalii, a malo ia malo faatamalii. Ae le gata i lea na ia faafetaia ai foi le Malisi tuai i le faamaopoopo, lea lava o loo faaauau pea le ‘au mo alo ma tamafanau o le atunuu.
O le afioga ia Leota Isaako na talifuaitau i le saunoaga a le Konesula ma fai meaalofa ai i ni laei na saunia e le kalapu.
O le maualuga ma le matagofie o lea po o faafiafiaga a le faili a le G-Mana Band na faafiafia ai le auvalaaulia.
Sa faapea foi ona tauaao e le Pacific Ezy Money Transfer se meaalofa tupe i lea po auā le fesoasoani i le masii atu a le aulakapi.
O le taeao o le Aso Toonai na tuua ai laufanua o Aukilani e le faigamalaga o loo taitai e le Peresetene le afioga ia Leota Isaako.
O le agaga fiafia ma le faafetai i le pulega a le ‘au, ona o kamupani o loo latou galulue faatasi, e pei o le afioga ia Galumalemana Tai Galumalemana, PFL, Pacific Ezy Money, ma le Talimanao, ua mafai ai ona faataunuuina fuafuaga ma polokalame mo le ‘au, aemaise ai o le togiga fou lea sa faatauina e le afioga i le pule o le G-Mana Wholesale Autos.
