Na maua e le tatou nusipepa ni faamaumauga e faamaonia ai le suia lea o tausaga o taavale la’upasese poo taxis e le pulega ole LTA.
E pei ona silafia ole masina o Mati ole tausaga lenei na taofia ai e le Pulega ole Land Transport Authority i Samoa (LTA) taavale la’upasese ua silia ma le 15 tausaga le matutua e amata mai lea ile tausaga e 2002 agai atu i tua.
Ole tulafono lenei na pasia ai e le Kapeneta ile tausaga na tea nei ona ole manatu ile saogalemu ole mamalu femalagaa’i ole atunuu o faaaogāina taxi la’upasese nei ae ua fai si matutua tele o tausaga faatasi ai ma le taumafai lea ole Pulega ole LTA ina ia faaititia le fuainumera o taavale i luga ole aualatele ona ole poloka ile tele o taimi.
Ole faamalosia ai o lea tulafono fou ua alia’e mai ai ma nisi o faafitauli e ala lea ile suia faasolitulafono ai o tausaga o taavale o umia ai e nisi o sui ole Pulega ole LTA ma le naunautaiga ina ia mafai pea ona faaauau ai pea ona pasia e la’upasese ai.
Ole taavale ole ituaiga ole Toyota Camry numera ole laisene T454 tausaga e 2000 na suia lea ile tausaga e 2005, ole isi taavale laisene numera T1558 tausaga 2001 ae ua suia foi le tausaga ile 2005, ole taavale Toyota Allion T337 oloo tulaga lelei pea lona tausaga ole 2003 peitai na suia agai ile tausaga e 2006. I faamaumauga uma o nei taavale e tolu oloo resitala ai i lalo o nisi o Sui Ofisa Sili ole Pulega ole LTA.
Na fesiligia le Ofisa Sili ole Pulega ale LTA le tamaitai ia Taatialeoitiiti Agnes Tutuvanu-Schwalger e faatatau i lea mataupu, ae na ia ta’ua ai e lei maua muamua e le Pulega lenei mataupu, ma e fai si ogaoga o nei faiga ma e lē tatau foi ona tutupu mai nei ituaiga o gaioiga faapenei i totonu ole Pulega.
Saunoa foi Schwalger o lea faato’a tulai mai ile tofiga ole Ofisa Sili ma e lē mama ia te ia nei tuua’iga, ma ole a faagasolo iai suesuega ale Pulega pe faamaonia nei tuua’iga pe leai.
Ole tamaitai ia Taatialeoitiiti Agnes Tutuvanu-Schwalger e lei leva talu ai nei ona tofia ai e le Kapeneta e avea ai ma Pule Sili ole Pulega o Fela’uaiga ile Laueleele e sui tulaga ai ia Leasi Vainalepa Galuvao ua tele tausaga o avea ai ma Pule Sili ole LTA.
Ole tatalo ale tamaitai Pule na ia talosaga ai le mamalu ole atunuu ina ia faaoo atu uma soo se mataupu ile pulega aemaise lava o mataupu ogaoga ina ia faatino ai sailiiliga e faamautu ai soo se faaseā poo ni tuua’iga.
Fai mai a Schwalger, oloo mautu lava faiga faavae ma taiala mo le Pulega e aofia ai ma ia ole Pule Sili seia oo lava ile aufaigaluega, ma e ao foi ona mulimulitaia.
Ua iai foi aulape o nei faiga faavae e limataitaiina ai le Pulega i ana faaiuga fai, pe a solia ma faamaonia ua lē tusa se faatinoga ma ala e ao ona tausisia e se tasi ole aufaigaluega.
O nisi o vaega oloo ave ai le faamuamua ale tamaitai Ofisa Sili e aofia ai le siitia ise tulaga faamalieina le auaunaga ale Pulega ina ia mafai ona tali atu i manaoga ole atunuu poo soo se isi lava ise auala e faamalieina ai i totonu ose taimi talafeagai, taumafai pea ia faaosofia ma faamalosia ile aufaigaluega le tāua ole galue faamaoni ma tausisi i aga tausili (ethical) i soo se taimi a’o avea ma tagata faigaluega ale Pulega, toe tilotilo toto’a i faiga faavae oloo limataitaina ai galuega mo le vaavaaia o Konekarate oloo gafa ma galuega tau auala ina ia mautinoa ole tupe oloo faaaluina e talafeagai lelei ma le galuega ua faatino (value for money spent).
Na maua e le tatou nusipepa le faia ai ose fonotaga faatopetope ale Pulega ole LTA ile vaiaso na tea nei e suesue ai poo ai le tagata faigaluega na liki mai ai i tua ni pepa tāua ale Pulega oloo maua ai le suiga ua faia i taavale e pei ona ta’ua ile amataga ole tatou lipoti.
