I le mae‘a ai o le fusuaga a le alo o Samoa, Mark Hunt lea na manumalo ai i le tu‘ioti i le alii Rusia o Stefan Struev, na amata tuufesili ai le toatele poo ai le isi paga o le a fetaui ma Mark Hunt. I le fusuaga tele o loo loma nei a le UFC 60, sa fuafua e fetaui ai le alii o loo numera tasi nei i le lalolagi o Junior Dos Santos ma le alii e suafa ia Allaister Overeem, peitai, ua faailoa mai nei e Allister ua lē mafai ona ia faataunuuina lea fusuaga ona o loo aafia o ia i manu‘aga.
E tasi lava le igoa na alia‘e mai e sui tulaga ia Allister Overeem e faafetauia Santos, o Mark Hunt. Peitai o le Aso Lulu o le vaiaso na tea nei na faailoa mai ai e le Peresitene o le UFC, Dana White e faapea, ua teena e Mark Hunt le fusuaga ma Santos.
Ae ina ua fesiligia Mark Hunt e le aufaasalalau, na teena ai e Hunt le faaaliga a Dana White. Na ta‘ua e Hunt o ia o loo nofo sauni e fusu i soo se tagata i soo se taimi lava. Na ia ta‘ua foi, afai e ofo atu ia te ia le avanoa e fetaui ai ma Santos, o le a ia talia ma lona agaga fiafia.
O Mark Hunt o loo faatulaga i le numera 9 i le UFC, e faatusa ia Santos o loo faatulaga i le numera 2.
O Santos ua 9 fusuaga, 1 le faia‘ina, sa ia umia le siamupini o le lalolagi mai ia Novema 2011 seia oo mai ia Setema 2012, ae na se‘ia ai lana fusi i le alii o Cain Velasquez, o lana faia‘ina muamua foi lea. O Mark Hunt ua 4 ana fusuaga i le UFC e tasi le faia‘ina.
O le faaiuga lava o le vaiaso na tea nei na toe faailoa mai ai e le Peresitene o le UFC, Dana White, ua mae‘a ona la talanoa ma Mark Hunt ma ua iai le maliega ua faia, o le a fetaui ai Hunt ma Santos i le masina o Me o le tausaga nei lava i le MGM Grand Casino i Las Vegas.
Na ta‘ua e Hunt, e lē faigofie se la taaloga ma Santos, ona o le puupuu o le taimi o le a tapena ai. Peitai, i lona olaga fusu sa fetaui ma le toatele o tama iloga i le lalolagi ma ua iai foi lona masani e talia ai fusuaga faafuasei faapea ma manumalo ai.
E atagia mai i talanoaga i luga o le upega tafailagi, e laitiiti se avanoa e ono malo ai Mark Hunt ia Santos, peitai, o le tulaga foi lea sa iai le manatu o le toatele ina ua faalauiloa le fusuaga a Hunt ma le alii Rusia o Struev, lea o loo faia sona taotoga e toe faaleleia ai lona auvae na gau ina ua lavea i le agavale o Mark Hunt. Na faailoa foi e Hunt lona alofa ia Struev i manu‘aga o feagai ma ia e mafua mai i le la taaloga.
Ua amata nei tapenaga a le alo o Samoa mo lana fusuaga lea ua sauni atu nei i ai i le masina o Me. O Mark Hunt o loo aumau nei i Sini Ausetalia ma koleni ai.
