Ua faamautuina le matagofie o siufofoga o alo o le Pasefika i Ausetalia nei e ala i tauvaga pese e pei o le Australian Idol, X-Factor, Australia’s Got Talent faapea le Polokalame fou o le ‘Siufofoga’ poo le ‘Voice’. O lenei tauvaga fou o le ‘Voice’ e ese lona faatinoina mai isi tauvaga muamua. E toafa faamasino, o le alii Pese Amerika ia Joel Madden mai le faaili o le Good Charlotte, o le isi faamasino o le tamaitai o Delta Goodrem ma Keith Urban le toalua o Nicole Kidman.
Ae peitai o le alii faamasino aupito tautaua o lenei toafa o SEAL le tama pese mai Peretania, ua faitau miliona le tau o ana fatuga e pei o le ‘Crazy’ faapea le vii o le ata tifaga iloga o le Batman i le 1991 ua faaigoa o le ‘Kiss From a Rose’.
I le faagasologa o lenei tauvaga e faigata tele na tauanau e leo o isi sui tauva le Alii o Seal.
Na saunoa Seal o le taimi e faalogo ai o ia i se leo e ese ai lava lona matagofie, o ina e silafia ai e tagata lona lagolagoina o lea sui ona faatoa oomi lana faamau ma liliu lona nofoa e faasaga i le tagata pese.
O le tulaga lena na iai ina ua pese le tamaitai o Paula Parore mai Perth, e lei uma le fuaiupu muamua a Paula ae tulai Seal ma patipati ona aao i le uigaese o lenei siufofoga.
Na ia ta‘ua o lenei tina talavou ua matua ese mai lona leo i sui uma na muamua atu ona o le maualuga matagofie. Ua talitonu Seal e ono sola Paula ma le siamupini.
Na maofa foi ma talia e Seal isi alo o Samoa e pei o Michael Dusheine lea na matauina lona agavaa i le kitara ma lona siufofoga malie.
O le vaiaso nei i le ‘Voice’ ua sauni atu ai foi se isi tamaitai Samoa leo lelei ia ‘Prinnie’ e pese ai.
O Prinnie ua loa ona pese i faafiafiaga a Samoa i Sini ma na ia tatalaina le Koneseti a le alo Samoa ia Spawn Breezie i Liverpool i le vaiaso ua tea. O lona siufofoga ua faatusalia ia Mariah Carey ma e ono filifilia foi i le vaega a Seal.
Na saunoa ‘Seal’ e leai sana galuega tele e toe faia i leo o nei fanau talenia pau le itu e ono faasino i ai, o nisi o laasaga e uia e i laua aua le ausia o le sini autu. Faapea Pese e usuina i le tauvaga o loo totoe.
I le isi foi tauvaga i le Alaata Fitu (Channel 7) o le Australia’s Got Talent na matua faateia e le alii Samoa ia Mark Lowndes mai Brisbane alii Faamasino i lana Pese na fatu ‘Remember Me’.
O alii Faamasino ia Kyle Sandilands, Brian MacFadden ma le tamaitai ia Danii Minogue na aufaatsi e to uma o latou pulou i lenei alo o Samoa.
O Mark na mafua ona ulufale i le tauvaga ina ua tauanau e nai ona alo laiti. I le vaega matutua, o le Aso Toonai talu ai na faafiafia ai foi Felise Mikaele i Sini.
O le aai o Glenquarie na faia ai lea faamoemoe mai le 9 i le taeao agai atu i le tasi i le aoauli i le atoa o le 20 tausaga o lana pese ‘Tama Samoa’ mo i latou e fiafia tele i ana fatuga.
