“Tautuana le igoa o Samoa, o si masei laititi e faaleagaina ai tapenaga lelei uma”…Palemia
E faitau miliona tupe ua faaalu e le Malo o Samoa ma tupe o fesoasoani mai ana paaga i fafo ua faatino ai tapenaga uma o le fono tele lona tolu a atunuu laiti tau atia‘e o le lalolagi ua amata usuia i lenei vaiaso i ni fonotaga laiti e aofia ai le fono a tupulaga talavou, sosoo ai ma le fono autu i le vaiaso a sau.
O ni nofoaga ua molimauina le maoa‘e o tapenaga ua faia i ai, ona o fale taalo ua liua nei e avea ma maota mo fonotaga tetele faavaomalo e pei ona vaaia ma molimauina i le sauniga na faapaia ai loa nofoaga. Na faatumulia ai se tasi o maota le Gym One, i le aufaigaluega a le Malo o le a galulue i le taimi atoa o le fonotaga lea sa saunoa ai le taitai o le Malo le afioga i le Palemia, ma ia ave fautuaga i le aufaigaluega.
“Tautuana le igoa tauleleia o Samoa, o si mea laititi lava e faaletonu e faaleagaina ai tapenaga lelei uma…O na foi faaletonu o nei aso ua vave fesootaiga o le isi 24 itula ua salalau i le lalolagi”.
O lapataiga ia a le Palemia a o faafofoga ma le toto‘a le aufaigaluega sa auai aemaise sa molimauina foi e nisi o le aufaasalalau ma tusitala i lo tatou atunuu. O le asiasiga faataamilo i nofoaga uma na matuā maofa ai, i le taugata o totoga eseese ua fausia ai nisi o nofoaga aemaise lava o le nofoaga autu mo faasalalauga le media center.
O se tasi lea o nofoaga tāua o le a tapuvae tasi uma i ai faamatalaga o mataupu o le a talanoaina ma faapea ona lipotia ma faasalalau ai e tusitala o faletelevise, nusipepa, ma leitio faapea fesootaiga i luga o initaneti ma isi fesootaiga televavave faaonapo nei.
Na faaalia e se tasi o ofisa sinia o le Matagaluega a le Palemia, masalo o se tapenaga sili lea ona tele ua faia e le Malo o Samoa, i le itu tau fonotaga faavaomalo auā e selau lima sefulu atunuu laiti o le lalolagi o le a malaga mai a latou usugafono.
E le gata o sui o ia atunuu ae o le a malaga mai ai foi sui o faalapotopotoga tetele i le lalolagi o loo sasaa mai ana seleni i polokalame ma taumafaiga i le atina‘e o atunuu laiti ina ia mafai ona fesoasoani ia latou fuafuaga mo le tali atu i fesuiaiga o le tau e pei ona autu i ai le fonotaga. O le molimau lava ia a le tusitala atonu o le faatomuaga lea o nisi fono tetele o le a talimalo ai Samoa i ni tausaga o i luma, auā o le tala ave lea o le a salalau atu i le taimi o le fono a atunuu laiti tau atia‘e.
E le gata o nofoaga o le a faia ai lea fonotaga ae o isi tapenaga uma e pei o se nofoaga ua faapitoa mo le saunia o taumafataga lea ua faaigoaina o le Namu‘a Food Court. Ua iai uma fale‘aiga eseese e agai i ai usugafono e faatau ai meataumafa.
O le Aso Faraile na tea nei na faia ai se faataitaiga na tofo ai e le atunuu tapenaga fale‘aiga uma ma le faatinoga o le latou tautua. E siamu foi lea vaega o tapenaga e ui ina iai nai faaletonu ae o le tāua lea o le faataitaiga na faia e pei ona saunoa le taitaifono o le komiti mo lea vaega o le taligamalo a Samoa le afioga i le tamaitai minisita lagolago o le matagaluega o tina ma tamaitai, Gatoloaifaana Amataga Gidlow.
O ni faaletonu ua matauina o le a teuteu ma auli faalelei ai le latou tautua a o lei faatinoina le galuega o le auaunaga mo i latou o le a faaaogāina le nofoaga mo taumafataga.
