Maoa‘e pasese pa‘ū mo Melepone i le faaaliga Ofisa Malaga

Afioga Peseta John Nickel ma le afioga ia Faalavaau Fasitau Ula
Afioga Peseta John Nickel ma le afioga ia Faalavaau Fasitau Ula

Faatoa mae‘a atu aso malolo o le Kerisimasi ma le Tausaga Fou sa tele ina faimalaga ai le paia lasilasi o le atunuu mai tulimanu e fia o le kelope e asia aiga ma afioaga i Samoa. O le toe taliu i aiga ma fanua o aumau ai o ni faamavaega faigata ona o le lē mautinoa pe o afea foi ni tausaga e toe feiloai ai ona o le taugata o pasese i vaalele.

Peitai mo le paia ma le mamalu o alala ma papaaao i le aai o Melepone, o se tala fiafia ma le agaga faagaeetia ina ua maua le feiloaiga ma nisi o tamalii o avea ma ave fu‘a mo lo tatou atunuu i ofisa malaga, ae tainane sui o le matagaluega o tagata tafafao ma turisi o Samoa o loo faamautu i Ausetalia, i le Aso Toonai ma le Aso Sa na mavae atu nei, lea sa faia ai le faaaliga ma faalauiloa a ofisa malaga eseese mai atunuu e fia i le aai o Melepone.

Na maua le feiloaiga a la tatou pepa ma le afioga a Peseta John Nickel o le Fiji Airways ma ia faaalia ai la latou pa‘ū i le malaga i Samoa ma toe foi mai i le na o le valuselau tala ma ona tupu. A faatusatusa atu i tau masani o lo ua pa‘ū tele le faalauiloa lea, aemaise o loo faatolu i le vaiaso a latou malaga tuusa‘o mai Melepone i Samoa afea Fiti mo le itula e tasi.

Na mae‘a lea ona faasolo lea o le maimoaga i le faalauiloa a le My Beautiful Samoa, ma faailoa ai e le afioga Faalavaau Fasitau Ula le pa‘ū maoa‘e a se tasi o ofisa malaga le Flight Centre lea ua na o le limaselau ma ona tupu le pasese.

O se faalauiloa sa maitauina ai le toatele o tagata papalagi na afea le fale Samoa ma fesiligia mataaga ma faletalimalo aemaise o le siosiomaga ma le saogalemu i Samoa.

Na leai se faaletonu o le faalauiloa a le afioga ia Faalavaau aemaise o le susuga ia Carl Amos o se sui o le faletalimalo malosi o le Sheraton Samoa.

O loo amata nei ona logologopuialii le mamalu o le atunuu i luga o leitio ina ia silafia lenei pa‘ū faapitoa mo le malaga i Samoa mai Melepone ma le toe foi.