E lē gata ile sainia ole kamupani ole Pacific Trade and Invest mole lagolagosua ile faamoemoe tele ile Aso Faraile nei ae ua faailoa mai foi le taulia uma o tickets faapitoa ae lei aulia lenei faaaliga o taleni laei ma mamanu i lona tausaga lona lua oloo faauluulu ile tamaitai Faatonu ia Failepou Peni ma lona alii ia Pati e faia ile Dockside Pavilion i Darling Harbour i Sini ile aso 21 o Oketopa.
Saunoa le Pule ole PT&I ia Teremoana Mato, o la latou lagolago ia aogā atu ai foi i sui mai Samoa ma isi Atumotu Pasefika ia atili faailoa ai a latou taleni i Ausetalia nei.
Saunoa le tamaitai Faatonu ia Failepou Peni, Pule Sili/Faatonu o lenei faaaliga laei ma mamanu, e lē gata ole unaia ai o taleni a alii ma tamaitai Pasefika ae ia faatumauina ma sili atu foi mo lenei tausaga.
O lenei faamoemoe ua sauni atu ai nei le toaluasefuluono tamaitai ma alii su‘isu‘i ma tusi mamanu o ofu (designers) mai le atu Maikolonesia, Melanesia ma Polenisia.
O nei fuainumera ua iloa ai le vave sapaia male moomia e i latou nei mai Samoa male Pasefika o lenei faaaliga ma avanoa tatala atu mo pisinisi aemaise le tali i manaoga tau laei o tatou tagata.
Ole tausaga nei sa pisi ai foi le afioga ile tamaitai Pule Faatonu ia Failepou Peni e malaga atu ai ma faatautaia ni faaaliga faapenei sa faia i Papua Niu Kini ia Aokuso 2016 faapea le Pacific Fusion Fashion na faia ia Setema i Niu Sila, na faatasi atu ai foi Failepou. Na toe lele atu foi o ia i Samoa ile vaitau ole Teuila faapea le Atu Kuki.
Sa faafetai e Failepou ile faatasi mai ole Atua i tapenaga uma ua maualuga ma taunuu ai le faamoemoe aemaise le gasolo mai o kamupani e fia lagolagosua e pei ole Fiji Beauty Products mo meaalofa mole valaaulia faapitoa.
Ole isi kamupani e aofia ai le Moana Gems Pearl and Art Gallery lea e faapitoa la latou auaunaga mole atinaeina ole Penina Uliuli. Ole fale mataaga Australian Museum lea foi na ofo atu la latou lagolago mole faafeiloaiga ole valaaulia ma la latou Pacific Warriors.
Sa toe faailoa ai foi ele faatonu le manuia male agai luma o lenei taumafaiga ile alofa ole Atua sa amata ile tausaga talu ai i Arts Centre a Sini le Carriageworks lea na taulia ai le 400 o pepa ulufale male 200 o valaaulia faapitoa. E 12 designers, 60 Models, 20 makeup artists, 25 pueata male 50 o tagata fesoasoani ua siitia ai tapeaga o lenei faamoemoe ile 2016.
