Mafutaga Neiafu i Aukilani male aumalaga mai Samoa.

Mafutaga Neiafu i Aukilani male aumalaga mai Samoa.

Poo fea lava e lele iai le toloa e maau lava ile vai, auā ole tagata ma lona faasinomaga ole tagata foi ma lona tupuaga. O lou aiga ma lou nuu ole tofi lea ole tagata mai le Atua, ae ua iloa foi le Isaraelu moni ile susue o lona faamalama ma vaavaai i lona afioaga poo lona nuu.

Ole ata vaaia lea sa molimauina ai le pepese ma sisiva fiafia o tamafanau ole afioaga o Neiafu ile taeao ole Aso Toonai 29 o Aperila ile hall ale ekalesia Metotisi i Papatoetoe a‘o militino faatasi e lagolago le sailiga seleni ale Matagaluega ale Ekalesia Metotisi mai Neiafu-tai ile susuga ile faafeagaiga ia Rev Pasaito ma le faletua ia Siniva faapea le matagaluega.O lupe sa vao eseese a ua fuifui faatasi ona ole fia galue ma le fia togi ose maa auā le faamoemoe e pei ona tauasa mamao mai ai sui ole matagaluega mai Neiafu-tai aemaise ole faipule ole itumalo. O lupe faalele ole afioaga o Neiafu olo tala faauto ile galuega ale Atua i Ueligitone faapea Palmerston North faatasi ai ma Aukilani nei sa auai uma i lenei faamoemoe.

Ole susuga ile Sea ole faasinoti i Saute ia Rev Masunu Utumapu na ia saunia le sauniga lotu e amata ai le polokalame faatasi ai ma lana sausaunoaga na tatala aloaia ai faafiafiaga ole aso ma faasolo ane ai loa i Ipu a matagaluega taitasi o Sinoti e lua ale ekalesia Metotisi ile itu i Matu ma le itu i Saute.

Na vaaia le sagisagi fiafia o tausi matagaluega faapea aulotu taitasi o ia Sinoti i lea aso ile latou pulupululima faatasi auā so latou sao ile faamoemoe ole matagaluega i Neiafu-tai. Na sosoo ma Ipu alofa a nisi o aiga o tamafanau lava o Neiafu e le o auai i totonu ole mafutaga ae o lea ua auai atu lava ona ole fia galue lava o ia ole Isaraelu moni, ma ua faailoa ai foi le lotonuu ma le fia tautua ile Atua ma lana galuega.

E toaono sui ole matagaluega i Samoa na malaga mai faatasi ai ma le faipule ole itumalo, ae sa lē manofonofo foi o latou sui ile fia lafo o so latou sao i totonu ole sailiga seleni ale ekalesia i totonu o Aukilani, ma o lea sa faia ai a latou siva e nisi o o latou aiga oloo aumau i Niu Sila nei.

Na faasolo le polokalame ole aso ma taualuga ai loa i Ipu ma faafiafiaga ale mafutaga i Aukilani ae tapunia ile sausaunoaga a aiga ole tausi matagaluega i Samoa ia Rev Pasaito ma le faletua ia Siniva.

Ole teuoloa ole mafutaga ia Peseta Vili o ia lea sa fofogaina le maau ma le milomilosia ole mamalu ole auvalaaulia sa tauaaoina i lea aso.

Ole tofa ia Taatiti Manoa ole sui ole aumalaga mai Samoa sa fai ma fofoga ole aumalaga ma le faipule mai Samoa faapea le mafutaga i Aukilani e momoli le agaga faafetai ona ole loto ua tumu ile fiafia ile paia ole aufaigaluega totofi ale Atua faapea le mamalu o Samoa potopoto sa auai ile lagolagoina ole faamoemoe ole matagaluega.

Saunoa Taatiti Manoa i lea aso, o lo‘u mativa ua outou matitiva ai, ua avea le limavaivai ole tausi matagaluega ua outou faatauvaa ai ile asō. O loimata ole fiafia ma le loto ua tumu ile olioli auā e leai se lagona ose meaaalofa lea ole a tauaaoina ele mafutaga ma le aumalaga mai Samoa.

Ole tofa ia Taatiti Filipo ole taitaifono lea ole mafutaga a Neiafu i Aukilani, o ia lea sa fai ma fofoga ole aso, ma o ia foi sa tu tootoo ile taimi o faaaloaloga lea sa tatala ai le malo auā le aufaigaluega ale Atua faapea le mamalu ole auvalaaulia.

Na patipatia ele mafutaga a Neiafu ma le matagaluega mai Samoa le maau ma le lima foai ole atunuu aemaise tamafanau ole afioaga o Neiafu e $156,192.60. Ma o lenei seleni ole a teuina loa ile tusitupe auā le faamoemoe ole matagaluega i Samoa ile toe fausiana lea ole malumalu tapuai ole aulotu i Neiafu-tai.

Ole tele o ipu a lupe faalele ale afioga oloo galulue i totonu o Niu Sila, e silia ile $1,000 agai i luga ile $8,000 ae faapea foi i nisi o ipu a aiga ole mafutaga ma ipu alofa mai aiga ma matagaluega ole sinoti e $1,000 agai i luga, ma o i na lagona ai e tamafanau ole afioaga o Neiafu i Niu Sila le talisapaia ole savali mai Samoa ile matagaluega i Neiafu-tai.

Comments

comments