E ui ole vao eseese male lasi o Mafutaga a Ekalesia, Nuu, Faalapotopotoga, Asosi ma kalapu i Sini, ae ua iloga nei lo latou lagolago mole Samoana Sports Day. O lenei faamoemoe ua atofa mole Aso Gafua a sau le aso malolo ole Queens Birthday tolu o Oketopa.
E faia lenei faamoemoe tele ile malae o Woodward Park i Liverpool mai le taeao seia paia le afiafi, ma ose faamoemoe ole Fono Aoao a Tagata Samoa i Sini ia faatasi ai le atunuu ma tupulaga i taaloga pei o le Oz Tag, Volipolo male netipolo, faleaiga, faafiafiaga ma taleni.
Ua saunia foi mole fanau ua tuua aoga suigi ma masini taavilivili tetele e fiafia iai i lea aso ma ua atili matagofie ai le tapenaga. Ose sui foi ole atunuu ua loa ona taalo liki faapolofesa ia Junior Tia Kilifi ole a avea ma fofoga ole aso faatasi ai male sui ole laulau ia Tiumalumatua Su‘a. O ekalesia faalapotopotoga, asosi ma mafutaga ua avea lenei aso e saili ai nai seleni mo atinae faifai pea e tauala atu i faleaiga o taumafa Samoa male soifua maloloina. Ose tasi o asosi na vaaia foi le lagolago ile uluai savali ole Samoa Day ia Iuni 2016, ua ofoina foi la latou fesoasoani mole faamamāina ole Paka pe a mae‘a le faamoemoe. Saunoa le Peresetene o Malisi Sagato Iosefo i Sini Hendry Lees ole latou sao lea ile Samoana Sports Day.
Ose aso foi faatoa vaaia ai le tele o alo o Samoa talenia ile netipolo mai lava ile iva tausaga seia oo ile aumatutua. E aofia ai le ‘au logologoā ale Hotshots lea na siamupini ile tauvaga aoao a Liverpool, Niu Sa Uelese sa taulamua ai le masaga ia Litara ma Naima Toala faapea Caitlyn Lee ma isi alo ua iloga le taaalo, ma o faiaoga ai nisi iloga ile taaloga ia Aiulu Aoina, Aiolupotea Valasi Tuisila Lee faapea Stephanie Lenitali Aoina.
Ile taaloga ole volipolo ua tatala foi le avanoa i nai ekalesia ma mafutaga e resitara ai mo taaloga i luga ole vao e fiafia ma faaafu ai, nai lo tauvaga faapolofesa. E maua foi a latou faailoga tupe, ae ole a tauaaoina uma Ipu i taaloga uma nei ia faaauau atu ile lumanai ma tuputupu pea.
