Maoae lagolago a le Malo e titina sauaga mataga i alo tamaitai

Ua aapa le Malo e lagolago malosi taumafaiga a le Faalapotopotoga o le Toomaga mo e Puapuagatia i le tafiesea o faiga matagā ma faiga faamalosi i alo tamaitai o le atunuu, e pei ona iai se taumafaiga a lea faalapotopotoga.
E $200,000 se vaegatupe ua ave e le Malo i le faalapotopotoga o le Toomaga e tapena ai le latou polokalame faalauiloa, ua fuafua e faatino i le amataga o le tausaga fou.
O le polokalame lea sa tuu e amata i le masina o Oketopa o le tausaga nei, ae talu ai mafatiaga ua feagai ma le atunuu ona o le galulolo ua tolopo ai i le tausaga a sau.
E luaselau afe na talosaga ai le faalapotopotoga i le Malo mo se fesoasoani tau tupe, ma ua talia atoa le talosaga, ma ua faafetaia ai e le alii pule o mataupu e faatoai i le Toomaga le Susuga Viliamu Paese, le lagolago a le Malo.
“O se faafetai a lenei faalapotopotoga ona ua manino le aumai o le faatuatuaga o le tatou Malo ia i matou e faatino ai lea polokalame. Ou te talitonu o se taimi muamua lenei ua ave ai se matou talosaga mo se seleni, ae ua vaai atu e lei faatafa le alii Palemia ma lana kapeneta i le faia o se faaiuga lelei e faamalieina ai a matou tapenaga”, o le saunoaga lea a Viliamu.
O le a faaaoga le seleni e pei ona saunoa le alii pule i galuega faalauiloa e faaaoga ai nusipepa, leitio, ma televise. O isi foi seleni o le a totogi ai auala o feoaiga ma isi vaega e fesootai ma le polokalame e pei ona fuafua e ono masina e faasavali ai i le atunuu atoa, e pei o le oo atu i nuu ma afioaga, o ekalesia ma faalapotopotoga eseese.
E le o ‘asa le aso ma le oo i le faamasinoga o solitulafono e aafia ai le faamalosi teine ma le faaoolima matagā, ma o se popolega lea na faaleo e le Faamasino Sili i nai tausaga e lei mamao atu, i le tatau i faalapotopotoga e fitoitonu ma nei mataupu faapea matagaluega a le Malo, ona faia se galuega e faaitiitia ma tafiesea ai ia faiga matagā ma solitulafono.
O le Toomaga mo e Puapuagatia na muamua faataoto le latou polokalame ma amata ai loa ana tapenaga e pei ona tali mai le Malo i se seleni tele mo le faatinoina.
O tagata e aafia i soo se mafatiaga e pei o faiga solitulafono e aafia ai fanau a le atunuu o loo malu i le vaaiga a le faalapotopotoga, ma o le isi lea a latou auaunaga o loo ofo atu.
E lei leva ona faavae ma faatu le faalapotopotoga ae ua molimauina le avea ma nofoaga e sulufai i ai le toatele o le atunuu mo le fia maua o se fesoasoani ma se laveai i ni mafatiaga ma faafitauli o le soifuaga o loo aafia ai.
O le Minisita o Galuega Tetele a le Malo, le Afioga Tuisugaletauā Sofara Aveau, o loo avea ma faatamā poo le patron, ae o le lio o galuega fesoasoani a le faalapotopotoga o loo iai ma nisi o taitai maualuluga o le Malo e aofia ai ma nisi o tumutumu o le atunuu.
O le naunautaiga lava e tasi, ia fesoasoani ia i latou ua aafia i ni soligatulafono ma faafitauli aemaise o faiga matagā ma faiga faamalosi i alo ma fanau teine a Samoa.