Pr Samuelu Afamasaga ma le Autalavou SDA a Riverview ina ua fu’e le suavai o talo, i’a mamoe ma palusami

Pr Samuelu Afamasaga ma le Autalavou SDA a Riverview ina ua fu’e le suavai o talo, i’a mamoe ma palusami

Ole talanoaina ma le lufilufiina e failauga faapitoa ole mataupu e uiga i auala felavasa’i, (crosswords) e lei nunumi pe faanenefu ai finagalo ma lagona o tupulaga talavou sa auai ile camp faitaulia ale ekalesia Aso Fitu Samoa  (S.D.A) a Riverview a’o momoli atu le feau tima’i e failauga faapitoa. Ole ekalesia lea o loo tausia ele susuga ile faafeagaiga ia Pastor Ieti ma le faletua ia Aloga Ah Siu.

Ose faatasiga e iai le talitonuga e lei taliu samasamanoa se talavou ma se ato gaogao ae ua na’o ato osaosa ma tutumu, e lē gata ole felanulanuai o taumafa faaletino, ae ole anoanoa’i o taumafa faaleagaga, na matuai latalata ai mafutaga mafanafana o mafutaga faaleuso, faaleuo faapea le aiga ia Keriso.

Na tatalaina aloaia le faatasiga ile po ole Aso Faraile 29 o Mati, lea na tomua ai ile faafeiloaiga ale ta’ita’i autalavou le faletua ia Si’olo Pule e faafeiloai ai le auvalaaulia faapea le autalavou aemaise le fofoga autu ole po, le susuga ia Pastor Francis Pule, sa ia folafolaina se taumafa faaleagaga.

Ole taeao ole Sapati Aso Toonai na fesuia’i manogi ole lolo e ala i upu faalaei’au mai lana auauna, susuga ia Pastor Samuelu Afamasaga, sa auai ma mafuta ai ile weekend ma le faletua ia Emma Afamasaga ma le nofoaalo mai le ekalesia Aso Fitu Koneferenisi i Logan City.

Ekalesia SDA a Riverview vaevaeina i vaega e lua sa faatino polokalame mananaia a’o Camp ile Easter weekend

Ekalesia SDA a Riverview vaevaeina i vaega e lua sa faatino polokalame mananaia a’o Camp ile Easter weekend

E tele ni vaega tāua o semina sa faasoa e lana auauna ma ia tatala ai le avanoa e fesili ai le autalavou e tatala ai o latou lagona ini vaega ole lotu e lē o manino ai, aemaise ole va o fanau ma mātua.

Na tapunia le sapati ae alo le autalavou i taaloga e iai le piliati, bing bong, tomino ma eva ile laufau mālū ma le toafilemu ole nofoaga o Mount Grosby Allawah Scout Camp. Na vaevaeina le autalavou i vaega e lua, na malo usu mai Saoluafata ae tali le alalafaga o Falelatai, lea na faia ai le ‘ava o feiloaiga.

Na mamalu le aso auā na faatinoina lava le ‘ava o le feiloa’iga aemaise le onomea ma le tomai o tupulaga talavou sa faatinoina lauga usu, lauga e tali atu ai, folafola ‘ava, tautu, ma ole taeao ole Aso Sa na sisiina a’e ai le tagāvai o Samoa ina ua pulou le suavai sa faatinoina uma ele autalavou le pusaina ole umu, sasa’e, ofuina o palusami, faapea le supoesi, suafa’i ma isi lava taumafa faa-Samoa, ona feagai lea ma le leoleo taeao na saunia ele faafeagaiga ia Pr Ieti Ah Siu.

Na mae’a ona alo lea i tala faa-Samoa sosoo ai le taumafataga tele ua pei lava oloo taumamafa i Samoa. Na liligo le fogatia ile logo mālie o pese faaleaganuu ma pese faitaga na faaofo ai le auvalaaulia ile agavaa ole autalavou ma le ekalesia sa faatinoina. Na vaevaeina le autalavou i vaega e lua, na malo usu mai Saoluafata ae faatalia mai e le alalafaga o Falelatai, ma na matuai maoa’e le onomea o talavou ile faaaogāina ole gagana Samoa a’o alaga ia latou lauga. Na mamalu le aso auā na faatinoina lava le ‘ava ole feiloa’iga faapea le tomai o tupulaga talavou sa faatinoina lauga usu, lauga  tali, folafola ‘ava, tautu’ava, ma le alo tamaitai ole taitai toeaina o ia sa palu’ava.

E tusa ma le 74 le ekalesia Aso Fitu a Riverview, ose mea lava ina a lelei ole nofo fealofani ma tasi le loto auā na faalogo uma ia i latou ua avea ma ta’ita’i, na sologa lelei ai ma manuia le faamoemoe. Sa auai mai foi le faletua ia Apo Solofa mai Samoa o ia sa feagai ma le leoleo taeao sa tapunia aloaia ai le faatasiga ile taeao  ole Aso Gafua a’o feagai ma le aso malolo ole Eseta.

Ofisa ole Autalavou SDA a Riverview:

Taitai Autalavou: Si’olo Pule

Sui Taitai: Easter Faamatuainu

Failautusi: Alwyn Afamasaga

Sui failautusi: Malaefou Siulai

Taitai Toeaina ole Ekalesia: Tu’i Solofa Solofa