E matautia faiga a le U-20 a Samoa i Harare, Zimbabwe. Ua siamupini Samoa i le Ipu o le Lalolagi i lana taaloga faaiu ma Sepania i le taeao nei. Ua malolo ai Sepania i le Manu i ‘ai e 38-32.
O se taaloga matautia tele. Faatoa maua le manumalo a Samoa i le minute mulimuli o le taaloga. O Sepania na i luma lona vaa i ‘ai e valu ae e toe iva minute o le taaloga. A o le tatao lona tolu a Elia Elia le numera valu a Samoa i minute faaiu o le taaloga na sao ai ma faaopoopo ai loa ma le taimi o le taaloga.
O Elia na sefeina le taaloga, a o Tivoli Masaga na seia le manumalo mai ia Sepania i lana tatao i le tulimanu i le taimi faaopoopo o le taaloga.
Mai lava i le amataga o le taaloga sa vaaia o le aasa o le ‘au a Sepania. Na sikoa muamua tama mai Europa mai le laina i tua. O le vaega foi lea o le tami ma tamoega faaseleulu na lē mautonu ai Samoa, ma sikoa ai loa ma Sepania i le amataga o le taaloga.
E lei umi ae tali Samoa i sikoa muamua a Elia le tatou numera valu mai le piki ma tamoe, piki ma tamoe atu i laina.
Sosoo sikoa a Samoa i lea lava metotia, a o Salesi Ravasi na sikoa. E lei misi le aa a D’Angelo Leuila ma faga ai i luma Samoa i le 16-8.
I taimi faaiu o le ‘afa muamua na faasala ai mo le sefulu minute le numera fitu a Samoa. O iina na toe sao mai ai Sepania i ana sikoa ae na sili pea ‘ai o Samoa i le amataga o le ‘afa lona lua i ‘ai 16-14.
O Samoa na sikoa muamua i le ‘afa lona lua e auala i sikoa lona lua foi a Elia Elia. Ona sau ai loa lea o Sepania ma maua ai a latou sikoa sosoo e lua. O le sikoa mulimuli a Sepania i minute 63 o le taaloga, ova le aa – Sepania 30-24 a Samoa. Toe sala Samoa ma aa e Sepania maua ai ‘ai e lua, 32-24 o le taaloga ae toe iva minute o totoe.
Taumafai loa Samoa ma maua ai le sao o le numera sefulu, Laaloi Leilua mai le latou lava ‘afa, ma sao atu i le 22 a Sepania. Saeu le polo ma maua ai e Elia ma fosi atu lona avanoa i lalo o le pou. O le faigofie o le aa na tutusa ai ‘ai o le taaloga 32-32.
Na iai le avanoa e manumalo ai Samoa i taimi o totoe ina ua maua le sala a Samoa i minute 88 o le taaloga. Peitai na misi le aa a Leilua ma uma ai loa ma le taimi.
O le taimi faaopoopo o le taaloga na puipui ai e le foueki a Samoa le polo. I luma o le pou na iai le avanoa laititi lava mo mili-sekone e aa pa‘ū ai mo le lua ‘ai peitai na pulea e Siliko le tatou ‘afa ona lagona, ma tulei atu ai i autafa le polo atu i tua.
Maua iina e Iafeta Masaga ua na o ia ma pasi atu i ai le polo, ma sikoa ai iina Samoa. Ua uma le taaloga i le manumalo a le Manu.
O le avanoa a Samoa i le Taaloga mo le Ipu na manumalo ai ia Uruguay i ‘ai e 56-22. O lea manumalo na sapasapaia lelei lava e le foueki a le ‘au aemaise le faatonutonu a le numera sefulu a le ‘au, D’Angelo Leuila. E 20 ana ‘ai na maua i le taaloga lea, leai ma sana aa na misi. O le taimi muamua lenei a Sepania i le taamilosaga U-20 a le lalolagi. E ui ina ua matuā faanoanoa le ‘au a o le aogā o lenei taamilosaga mo le lakapi a Sepania o le a faapea ona tuliloa ai i luma le taaloga mo le atunuu.
I le taaloga mo le tulaga tolu o le taamilosaga na manumalo ai Fiti ia Namibia i ‘ai e 44-30. E matautia foi lea taaloga auā na i luma Fiti i ‘ai 44 i le leai a Namibia, peitai o le ‘afa lona lua na toe sau ai le ‘au mai Aferika ma maua ai a latou ‘ai e tolusefulu.
Sikoa:
Samoa – Elia Elia (3); Iafeta Masaga; Salesi Rayasi; D’Angelo Leuila (4)
Sepania – Narciso Dominguez (2); Vaisset; Arrieta Zabala; Rabagao (3)
