E lua fusu’aga na tulimata’ia i le faaiuga o le vaiaso ua te’a nei. Muamua, o le toe foi lea o Tyson Fury i le inau a mae’a le lua tausaga na malolo ai mai le maea. O le isi fusu’aga o le fetauiga lea a Jeff Horn o Ausetalia ma Terrence Crawford i Las Vegas.
Tyson Fury vs Sefer Seferi
O se fusu’aga malie le toe foi o Tyson Fury i le maea. E na’o le fa ta’amilosaga o le fusu’aga a Tyson Fury ma Sefer Seferi i Manchester i le po o le aso To’onai i Manchester ae togi le solo a Seferi. O le ulua’i manumalo lea a Fury talu mai Novema 2015 lea na manumalo ai ia Vladimir Klitschko i Fusi uma o le Paga Mamafa.
O le malie o lenei fusu’aga na amata mai i le savavali atu o alii nei i le maea. Ae o le amataga foi o le fusu’aga i ta’amilosaga e lua e lei tele ni tu’i na togi e Fury po’o Sefer. Na faatonu e le laufali Fury e taofi le fia fai mea malie ae amata loa ona fusu. O Sefer o lona tulaga i totonu o le Paga Mamafa o le numera #65. Fa’atusa lea ia Tyson Fury e lei iai ma se faiaina. Faaopoopo iai ma le maualuga o Tyson Fury na fiu Sefer e su’e sona avanoa i foliga o Tyson e le au ana tu’i ona o le umi tele o Tyson Fury.
O le taamilosaga lona tolu na amata ai ona soso’o so’a saoasaoa a Fury i foliga o Sefer. E ui e lei pa’u Sefer ae na vaaia le te’i o le alii i le mamafa o lima o Fury. Na uma ai iina ma le fa’ata’alo o le ta’aloga aua na togi i totonu le solo a le tulimanu a Sefer i le amataga o le taamilosaga lona fa.
E lei faateia se tasi i le faaiuga o lea fusu’aga muamua a Tyson. E na’o pau foi lea o le mea na mana’o ai le pulega a Fury, o le sailia lea ose tagata fusu faigofie e faapine ai le toe foi o Fury ile maea. Na ta’ua e Fury i le faaiuga o le fusu’aga e manaia le avanoa ua toe foi ai i le maea. O loo vaai taulai i le avanoa o loo soso’o ai i le aso 18 o Aukuso e toe fusu ai. O lena fusu’aga e fai lea i Ireland, ae e lei maua se isi la te fusu. E mautinoa, o le’a saili e le pulega se isi fusu’aga faigofie, ae o se tagata e lelei atu ia Sefer.
Jeff Horn vs Terence Crawford
Welterweight WBO Belt
E fai lava si fa’aletonu o Jeff Horn i lana fusu’aga i Las Vegas, na matua sauaina Terence Crawford i le fusu’aga atoa. O le taamilosaga 10 na taofia ai e le laufali le fusu’aga ina ua matua faaletonu foliga o le Ausetalia i osofaiga a le Amerika. Ua mamulu ai ma le Fusi o le WBO na ia Jeff Horn, lea na ia se’ia mai ia Manny Pacquiao i le tausaga ua mavae.
O le taimi muamua lea a Crawford i le Paga o le Welterweight, sa fusu o ia i lalo i le Super Lightweight. Ua soso’o ai ana manumalo e 33 (24 KO’s) i le fusu’aga ma Jeff Horn. Na taumafai Horn e fusu i luma ma agai atu i luma e su’e vaivaiga o Crawford. Ae na tali lea i le masau o lima o le Amerika. Na vi’ivi’i ai e Horn le poto o Crawford e faafetaui mai le ituaiga fusu na alu atu ma ia. E matua leaga lava manu’aga na o’o ia Horn i tu’i sasa’o a Crawford. Ua fautuaina ai le Ausetalia e faamavae loa ma le taaloga. O le lave o Horn na fusu i lona loto, ae e lei iai ma se ‘aupega na alu ma ia ile maea e o tutusa ma lona loto toa.
E taofi e le laufali (Robert Byrd) le fusu’aga ua mamao i luma ‘ai a Crawford, ae e lei sao foi ma se tui malosi a Horn i le alii Amerika. Na faitioina e Dean Lonergan le pulega a Horn le taofia vave o le fusu’aga. Na ta’ua e Lonergan sa iai le avanoa e manumalo ai Horn i le fusu’aga ae ua vave taofia e le laufali. Na o le talie o tagata i tala a Lonergan ona e taofia le fusuaga e mamao le malo o Crawford i ai, ae ua gata foi le malosi o Horn.
