Na faamanuiaina le alo o si o tatou atunuu, le susuga ia Taia Fonoti, ina ua manuamalo i le pine siliva, i le suega siamupini a Ausetalia, i le taaloga o le Taekwondo, lea sa faataunuuina i le aso 5 e oo i le aso 7 o Tesema 2014 i Adelaide.
O le susuga ia Taia, sa fusu i le paga mamafa i le fusipa‘u uliuli, ma na faia‘ina Taia i se alii papalagi mai Melbourne, i le final. Sa taumafai malosi lava o ia mo le pine auro, ae ona ua pau o sana taumafaiga i lea foi taimi.
Sa agiagia lava le tagavai, ma ta‘ua le suafa o si o tatou atunuu pele o Samoa, i le nofoaga sa faia ai nei taaloga.
O le viiga lava o le Atua e foi pea ia te Ia ona o le soifua saili o nai alo ma fanau i soo se faagatama auā o loo lealea maualuga pea le fu‘a a si o tatou atunuu o Samoa.
O lea ua sauni atu nei Taia, mo le sailia o le ‘au a Ausetalia, mo le suega siamupini a le lalolagi lea o le faia i Rusia i le 2015, aemaise foi sona avanoa e avea ai ma sui o Samoa, mo le isi taaloga a le South Pacific Games.
O le po o le Aso Tofi 11 o Tesema 2015, sa faataunuuina ai suega fusi (Gradings) a le Kalapu a Frank Frost, amata mai lava i le fusi samasama, e oo atu i le fusi uliuli, ma faaiuina ai loa toleniga mo lenei foi tausaga 2014.
Faafetai atu i le afioga ia Maligi Frank, mo le faatasi mai e molimauina si ona alo o Janaia Bowman, lea ua koleni i le tatou kalapu, faamalo lava le lagolago mo alo ma fanau aemaise o mātua faapea Samoa uma e fiafia e maimoa i lenei foi taaloga.
O le susuga ia Master Faalavelave Puipui Frank Frost, o loo avea ma faiaoga sinia a le kalapu. O le Frank Frost Taekwondo Australia, o loo galue malosi, auā le toleniina o alo ma fanau a o sauni atu mo fusuaga, mo tausaga o i luma ma le lumanai, aemaise foi le leoleoina o i latou mai faalavelave, e ono aafia ai lo latou soifua ma le ola.
Afai e te fia maua le faasiliga malosi o le tino ma puipuia oe mai faalavelave, ua na o le Taekwondo lava e toleniina oe ia ia lava tapena mo ia vaega.
Tatou taupule ola le alofa o le Atua e faataunuu fuafuaga o le tausaga pe a tala soifua so outou soifua ma so matou nei ola. Faafetai le lagolago mai.
Momoli atu foi faamanuiaga o le Kerisimasi ma le tausaga fou i paaga a le Taekwondo, auina atu ia Master Faalavelave Frank Frost ma le kalapu a le “Frank Frost Taekwondo Australia.”
