O le susuga ia Niuafolau Joel Ish-Ha-Elohim Amosa, ua 28 tausaga o le soifua, o se tasi o alo o Samoa, ua ia faamati’e maualuga foi le igoa pele o Samoa e ui lava o se tagatanuu a Niu Sila, ina ua foai atu ia te ia le faailoga o le manumalo o le tauvaga pese iloga i totonu o Niu Sila, le Lexus Song Quest mo le tausaga lenei 2018.
O lenei tauvaga e le faigofie ona ausia lona maualuga ma e tulimata’ia ei latou uma ua iai lenei tomai tau pese, le fia umia o lenei tulaga manumalo, ae i lenei tausaga 2018, o lenei ua faaeaina ai le alii o Niuafolau Joel Amosa. E tailua tausaga ma faagasolo le tauvaga lenei, lona uiga e tulimata’ia e i latou uma e fia tauva se avanoa e sao ai i totonu aemaise i faiga filifiliga faaiu.
Saunoa Amosa, o lana moemitiga lea ua leva ona moemiti iai a’o tuputupu a’e lona olaga. E tele taimi e faaata ai i lona mafaufau le faalogo atu ua valaau mai lona igoa ua manumalo i le faailoga, ae o lenei ua iu lava ina lē toe na’o se miti, ae ua matuā tino mai lana miti i se tulaga ua na’o le faagaeetia ai o le loto, le faafetai, ae sili lona faafoi o le viiga i le Atua e ana tomai ma le atamai uma i soo se taleni ua umia.
O se tauvaga e tausinio ai soo se tasi o iai lenei taleni mai itu e fa o Niu Sila, ae o Ueligitone ma Kalaiesetete sa malaga atu iai le laulau o faamasino e toalua i le vaega muamua (Preliminary Judges) sa faatautaia ai faataitaiga. Mo i latou na faatalosaga mai i nisi vaipanoa i fafo atu o Niu Sila, sa lafo mai a latou videos ona silasila lea iai o faamasino i taimi o Auditions e fua i ai le faiga o filifiliga.
Mai la i na uluai auditions, na filifili ai loa e faamasino muamua e toalua i latou e to’a 10 ua ausia le Semifinal, ma agai atu loa le to’a 10 lea i Ueligitone ina ia feiloai atu i le Faamasino Ulu (Head Judge) o Lisa Gasteen, e faaalu se taimi e galulue faatasi ma Gasteen. O ni avanoa faaauro na e pei o na ta’ua e Amosa, ua militino ai ma galulue faatasi ma i latou ua matutua pe ua mauaa tomai i lenei tomai tau musika, ma a’oa’oina atili mai ai le sosia o le atamai e faalautele ai le taleni.
Sa faatalatalanoa ai i latou e to’a 10 i nisi o taula’iga o a latou taleni mo le lumanai ma toe tomatauina atili ai foi i fautuaga mo le faaleleia atili o le tomai a’o savalia le ala i lenei tomai o pesega (Operatic World) Sa faia ni koneseti se 2 sa vaevae taitoalima ai i latou e pepese i le po, ma o le iuga o le koneseti lona lua, na faamuta ai loa taumafaiga a le isi toalima, ae filifili mai loa na’o le toalima e aofia ai ma Amosa mo latou faataitaiga faaiu seia oo ai lava i le po o le taualuga aoao o lenei tausinioga, lea ua ave ai e le alo Samoa, le alii o Niuafolau Joel Amosa le manumalo.
Saunoa Amosa, o lenei naunautaiga ia te ia e fia pese opera, na amata mai lava i le 3 o ona tausaga. Ma o nai ona grandparents lava o Tunaimati’a Pa’u Amosa & Ianeta Amosa, sa telē so la sao i le tausia a’e o ia, ma le totoina i lona loto o lenei loto naunau e fia pese. Fai mai Amosa, sa a’oa’o o ia e ona grandparents e usu le pese 92 i le tusipese a le EFKS, “Faafetai i le Atua” e pese ai i le Lotu Tamaiti o le tausaga e 1993. O le mea mālie, na ia pese tauloto uma lava fuaiupu e tolu o le pese ma lona tali, ma o iina lava e talitonu Amosa, na amata mai ai lana taleni pese.
Ina ua 7 ona tausaga, sa amata ona a’oa’o lana ta piano, ma o aso taitasi e faamautinoa e si ona tamā matua (grandad) e a’o lana ta piano. O se taleni e foliga sa mauaa i le aiga a’o tuputupu a’e Amosa auā o lona tamā matua foi sa avea o le ta okeni a le PIC Otara, sosoo ai ma le isi ona uncle sa ta piano foi i le PIC Otara ma na oo mai i le vaitaimi ua avea ai foi Joel Amosa ma ta piano mo le EFKS Taeaofua.
O le molimau lena a Amosa, o si ona Tamā Matua o Tunaimati’a, e telē lona aafiaga i lona olaga; e lē gata sa uunaia ai lona naunau i lenei taleni, ae i lona lava olaga o se alii talavou, sa fesoasoani tele si ona tuaa matua e totō tapulaa silisili e fafau a’e ai se olaga mausali ma le ‘anoa mo lona agai i luma. Ae fai mai Amosa, e moni la sa iai le tomai tau musika i lona aiga, ae lei iai se mafaufau o le tomai tau musika lea o le a agai iai o ia, i le pese opara, ae atonu o le faasinomaga lea o lona ituaiga o leo poo siufofoga, lea ua pei ai lava o se mea masani le agai ai o lona siufofoga pese.
Na matuā faamamafa ai lava i le saunoaga a Amosa lona agaga faafetai tele i nai ona aiga, i ona mātua, lona tuafafine, o ona mātua matutua poo grandparents, uncles ma aunties, cousins ma le tele o ana uo i Niu Sila ma isi atunuu ua pei lava o se aiga e tasi. Ma o lana lava lea mau, o mea uma na te faia, e na te faia mo lona aiga. Auā ana lē seanoa latou ma le latou lagolagosua i soo se auala sa latou faatino mai ai, semanu ailoga e tau i lenei maualuga lona faamoemoe i lenei taimi.
O taimi uma e fai ai koneseti e pese ai, e na te lagona le mitamita ma le agaga faagaeetia i le faalogo mai o valavalau atu faamalosi nai ona aiga ma patipati atu e faalototele ia te ia, ma e ui foi o nei ituaiga o koneseti e le taugofie le auai atu iai, ae e lē faafiti lava si ona aiga e fai taumafaiga uma ina ia mautinoa e iai iina ma taputapuai atu i ona faiva.
Sa ta’ua e Amosa, o nisi taimi, e lava a lona tilotilo mai i le felanulanuai o lanu o lavalava ma laei faasamoa o si ona aiga, e lē gata ua atili matagofie ai le vaaiga i lena faatasiga, ae e faamaite a’e ai ia te ia lagona faagaeetia ma le mitamita ma atili ai ona naunau ia ona faia le mea sili i lana taleni ua iai.
Sa afea foi e Amosa isi ona uso ma tuafāfine talavou i lana saunoaga, ona e iai lona faanaunautaiga, e matagofie tele lenei tomai, pe afai e ausia foi e isi talavou o loo mafaufau e fia maua. Auā o se ituaiga o tomai pese e ese foi le tutasi, e pei e te pese ma faamatala ai ni tala, ma e iai lona talitonuga e ese le ‘oa o talavou Pasefika i tala eseese o o latou tupuaga ma faasinomaga, ma o se tasi lenei o fola e manaia tele i le faamatala ai o na tala i se auala e lagi faapese.
Ae pei lava o isi tomai uma, e le na ona filiki lava o le lima maua loa pe na ona miti ai lava ae malama ane le taeao ua iai. Leai, e fai foi si faigata o le a’oina o lea ituaiga o leo ae a tuu atoa iai le loto ma le mafaufau, ma iai se faanaunauga fiafia e manao e ausia le tumutumuga o lenei tomai, e leai se mea e le mafai ona ausia.
Auā o le mea moni e toatele tagata Pasefika e siufofoga lelei, ma malolosi o latou siufofoga, ma e telē le avanoa e maua ai lenei taleni ‘anoa pe a a’o lelei le leo ma mulimulita’ia taiala talafeagai.
O le susuga Niuafolau Joel Amosa e galue i lana galuega tumau o se Regional Admin Manager mo le faletupe o le ASB, ma o le pese sa peiseai o se mea sa fiafia e fai e faapasi ai lona taimi ma toomaga iai i ona taimi paganoa. Ae na ia saunoa, talu mai le tauvaga lenei ua ia manumalo ai, e foliga ua iai se isi suiga tele i lona olaga, ma e tauau ina agai iina se isi suiga lea ua amata talatalanoa i ai le susuga Amosa. Lona uiga ua tilotilo e iai se taimi ua lē o toe mamao, ae tuua e Amosa laufanua o Niu Sila mo le agai atu i atunuu tetele o loo faalautele ai lenei tomai tāua.
Sa toe faafetaia e Amosa lona aiga, i lona tina ia Joyce ma lona tamā ia Tevaga, si ona tuafafine ia Filivaifale Natasha Lealofi Leavasa, aemaise si ona toalua ia Maia Amosa, ona o la latou tapuaiga mau ma upu faalaeiau.
E momoli foi lana faafetai i lana aoga o Dilworth School, aemaise lona faiaoga musika o Claire Caldwell i le telē o le fesoasoani a Caldwell i le uunaia o lona naunau e pese, ma mafai ai ona oo atu ana a’oa’oga i le iunivesite, ma e totogi foi e lona faiaoga ona pasese ina ia alu ai i faataitaiga sa faia i Otago ma faamalosiau pea ia te ia.
E lē gata i lea o lona uluai faiaoga lava i mea tau pese, o Rosie Barnes, o ia lena sa ta’u sa’o ia Amosa, e ono mafai ona avea o ia ma tama pese opera, ae tatau ona ia matuā uai atu e galue mamafa ma taumafai ia ausia lena tomai manaia.
O lana faafetai mulimuli, o lana iunivesite, le Univeristy of Otago, i le Music dept ma faiaoga – Isabel Cunningham, Prof. Terence Dennis, Judy Bellingham ma Frances Wilson. E telē foi se sao o i latou uma nei i le faaooina o Amosa i le maualuga ua iai nei.
O mātua o Joel Amosa, o lona tamā o Mailo Tevaga Sione Leavasa e mai afioaga o Vaiala ma Leauvaa, ae o lona tina ia Joyce Amosa-Leavasa e mai le afioaga o Magiagi, ae o lona suafa o Niuafolau e mai Vaiala.
E momoli atu foi le faafetai ma le faamanuia a le Samoa Times i lenei alo o Samoa mo le tomai ua faamanuiaina ai, aemaise o le avanoa ua faasoa mai ai lana tala i le nusipepa.
