Na matuā faamalieina le maimoa a Samoa i le taalo lotonuu ma le sailimalo a le Toa Samoa ina ua manumalo e 18-16 a le aumalosi a le Mate Ma‘a Tonga i le CBUS Stadium, Gold Coast.
E fā sikoa mataina a le ‘au a le atunuu mai alo o loo taaalo i le NRL ia na ofo e ave le fu‘a a Samoa. O se vaaiga mataina le toatele o le au tapuai a Samoa ma Tonga na masii atu e lagolago atunuu e lua.
Na faapea foi le pisapisao o le taaloga muamua na lami ai Fiti Bati i le Kumuls a Papua Niu Kini. Ae na amata mataina le taaloga autu i le faafiafiaga a ausiva a Samoa ma Tonga.
E lē gata i lea o faleaitu a Tofiga Fepuleai sa vavao ai tapuaiga a atunuu nei e fā. O le taimi na usuina ai vii faapea Siva Tau na matuā gatete ai CBUS Stadium i leo o tapuaiga e lua.
Na fetaui tino o tama ina ua ili le faaili ma amata ai loa fetauiga a puluafi. E uma le ‘afa muamua ua mataina le sao o le uigi ia Daniel Vidot ma Josh Maguire ia la sikoa mataina. O ‘ai o Tonga na maua lea i se sikoa a le uigi ia Jorge Taufua mo ai 10-6.
O le ‘afa faaiu na tuli tatao atu ai e Mate Ma‘a Tonga ma tutusa ai 14-14 mai sikoa a Sika Manu ma le lona lua a Jorge Taufua. Mo Samoa o le kapeteni ia Frank Pritchard ma lana sikoa na toe lifi ai le ta‘i 14-14 ae kiki loa le sala a Tonga sili ai 16-14 tusa ma le luasefulu minute o totoe.
O le taimi lea ma matuā alalaga ai le aumaimoa a Samoa ae peitai o Tonga ua na o le feei ma unai la latou ‘au ia faatini. Na vaaia foi le taumafai o Tonga e puipui malosi.
O se pue maualuga a Richard Faaoso na lavea ai Sam Kasiano. A o vaaia pea le malosi o osofaiga a Tonga na tulai mai ai se tasi o toa ia Dominique Peyroux lea na sikoa mataina ma sili ai loa Samoa 18-16 toe o nai minute o le taaloga o totoe.
O se leo faagalogata na iai Gold Coast i lea taimi ae o se vaaiga uigaese i foliga o Peyroux ma le Toa Samoa i lea taimi e faapei ua manumalo i le ipu o le lalolagi.
E lei uma ai le taua o mafaufauga auā i le polo na sosoo ai na lavea ai le fetu pupula o le Toa ia Tim Simona.
Sa toe sui tulaga atu ai loa Sam Kasiano ae taofi le taaloga ina ua lavea le alii o Conrad Hurrell i se pue malosi Dominique Peyroux ma ave ai lava i tua le alii Tonga.
A o sili pea Samoa 18-16 pe tusa ma le tolu minute o totoe e lei malolo osofaiga a Tonga e vaovao mai lava i luga o le laina ma o toe minute na osofai atu ai i le itu agavale Taufua pe tusa ma le ‘afa mita mai le fu‘a tulimanu na faapalasi atu ai mo le sikoa manumalo ae suaki loa e Kasiano lagolago i ai Pritchard le uigi a Tonga ma sola ai le Toa Samoa ma le manumalo mataina.
