Ina ua mae’a le tauvaga siva Hip Hop faavaomalo a Niu Sila i le po o le Aso Tofi ua mavae i le Vodafone i Manukau, na maualuga ai i lagona ma le maimoa a le toatele o le atunuu, ao le latou faamasinoga foi lea i le tauvaga lenei, e iu ina suipi le ausiva a Samoa i le tauvaga. E faavae lagona nei o tagata eseese sa auai ona o le tulaga ese ma le maualuga sa iai le faatinoina e alo ma fanau mai Samoa o le ituaiga siva lenei o le Hip Hop.
O le toatele o tagata sa faatumulia i lea po o tagata eseese mai isi atunuu sa agai atu ma tapuaia ausiva a aoga maualuluga sa auai i lea tauvaga faapea foi ma ausiva mai isi motu o le Pasifika sa tauva ai e pei o Tahiti ma Niue.
Ae o le ‘afa o le aumaimoa sa maitauina i lea afiafi o tagata Samoa. O le vaaiga mata’ina o lea po o le tutusa o taga a le ausiva e toasefululima sa tauaveina le tagavai o le atunuu i lea foi tauvaga.
O le tauvaga lenei e filifili ai se ausiva se tasi mai lenei itulagi, e tausinio ile tauvaga siva Hip Hop a le lalolagi i Arizon i Amerika. E ui lava la ina ua maea le tauvaga i lea po ma ua molimauina foi le tele o tala a tagata i le manaia o le ausiva mai Samoa, ae lei nofonofo lelei ai le fatu o le taitai malaga le afioga ia Toleafoa Pili Afamasaga, ma le aumalaga atoa ona o lea e lei oo i le po o le Aso Faraile e fai ai le tauvaga faaiu ma lau ai togi poo ai le ausiva o le a faamanuiaina.
Ina ua lau mai le faaiuga o le tauvaga ile po o le Aso Faraile ma maua ai le iuga e manumalo le ausiva mai Samoa i le vaega sa tauva ai i tagata matutua, ma ua sauni atu foi i Amerika i le sailiga siamupini a le lalolagi. Na lagona ai le agaga fiafia ma le loto faafetai i le Atua o le susuga i le taitai malaga ma sologa lelei ai foi ma le manava o le aumalaga atoa ina ua taulau o le faamoemoe.
E ui lava sa taumate pe ausia e le ausiva a le Toa ona o le maualuga na oo iai ausiva a Niu Sila sa tauva, ae o le agaga faafetai ina ua a’e malo le faatautaiga.
O le loto fiafia foi lea o le tapuaiga a Samoa i Aukilani sa auai i lea po ina ua maua le tala ua faamanuiaina le taumafai a alo ma tama fanau o le atunuu sa tauaveina le igoa o Samoa i lea foi tauvaga tele. Ua taunuu ai foi le upu masani a le atunuu ua ta fia falealili fua.
O le toatele o le aumalaga lenei, o le taimi muamua lea faatoa oo mai ai i Niu Sila, ae o le taimi muamua foi lea ua auai ini tauvaga tetele faapenei, e ese mai i tauvaga sa fai i Samoa. Ae o le avanoa tāua i le faigamalaga, ua mafai ona oo mai ai nei fanau i atunuu i fafo, ae ua maua ai foi ma le taimi e maua ai avanoa e auai atu ai ini aoaoga e faatatau i lenei lava ituaiga siva e toe tapena lelei ma faalelei atili ai le sauniuni atu i le sailiga siamupini i Amerika ia Aukuso.
O le Aso Sa na toe taliu atu ai le faigamalaga i Samoa, ma le faamoemoe o le a fai loa ni sailiga seleni auā le faasauni atu o le ausiva lenei i le tauvaga tele i Amerika.
