Na amata taaloga a le Manu Samoa mo le Ipu o le lalolagi lea ua amata i se manumalo ia Amerika 25-16. O ‘ai o Samoa na maua mai i le sikoa a le fulupeki ia Tim Nanai Williams i le ‘afa muamua faapea se sikoa mai le kapeteni ia Ofisa Treviranus i le ‘afa mulimuli aemaise ni sala sa ova mai ia Tusi Pisi ma Mike Stanley na sui atu i le ‘afa faaiu.
O le taaloga muamua lea a Samoa mai taaloga e fā o pulu taitasi. E lua foi sikoa a Amerika mai ia Chris Wyles (Kapeteni) ma Chris Baumann faapea ni sala se lua mai la latou numera sefulu ia Alan Macginty.
E tele ni sasi laiti a le Manu Samoa ma e talitonu nisi o le taaloga amata ae manatu nisi e lē tatau ona faatamala aemaise lea ua folifoli mai Aferika i Saute e laga lo latou faiaina maasiasi ia Iapani 34-32 i le aso Toonai talu ai.
I lea taaloga a Iapani ma Aferika i Saute le siamupini o le 1995 ma le 2007 na vaaia ai le paso o le Boks i faiga Iapani e lē gata o le puipui atu ae o le osofai.
O se tasi o alo o Samoa ia Sa‘u lea na Centre na taulamaua i le puipuiga o la latou laina.
Na atagia i le taaalo a Iapani le maoae o le galuega a le faiaoga fou ia Eddie Jones lea na faiaoga muamua mo le Wallabies i le 2003 talu ona suitulaga ia Sir John Kirwan.
O le manumalo lenei a Iapani 34-32 Aferika i Saute ua faaigoaina o le manumalo aupito maoae o le Ipu talu ona amata mai i le 1987. Ua sauni atu nei le Manu Samoa e tofotofo ma le Springboks i le Aso Sa nei pe mata e faaluaina le matatia a Iapani auā a manumalo le Manu Samoa o se taimi muammua foi lenei e ausia ai lea maafaamanatu i lana lakapi ma uma ai loa ma avanoa a Aferika i le taamilosaga.
O le isi vaaiga faapopole loto i le Manu Samoa o le fesootaiaga a le ‘afa ia Kahn Fotualii ma Tusi Pisi lea na tele kiki faaletonu ma pasi faatamala le polo i le taaloga ma Amerika.
Na ausia e le fulupeki ia Tim Nanai Williams le faailoga o le tama taalo o le taaloga mai lana sikoa faapea ana osofaiga mai tua. O le Aso Sa nei e fetaui ai ma le Springboks le Manu Samoa, sosoo ai Iapani i le vaiaso fou ma Sikotilani i tua atu e saili ai ‘au e lua pito i luga o pulu taitasi e sao atu i le 1/4 final.
