Ua mae‘a le taamilosaga i le taaloga tapolo, sa tapenaina ma tuufaatasia e le autalavou EFKS i Pakuranga.
O le taaloga sa faamanatuina ai ma le Taitai Autalavou, o ia sa fafauina ma polokalameina lea faamoemoe, peitai na faafuasei ona maliu i se faalavelave i Samoa.
O le susuga lea ia Tunumafono Pito Faalogo. Sa lagolago malosi foi lenei faamoemoe e le auaunaga faasalalau a le Radio Samoa ma le Samoa Times.
E toatele au ma tagata taitoatasi sa auai e tusa ai ma le molimau a nisi sa faaaogaina lea avanoa ma sa tausinio ai i le taamilosaga.
Ae le gata i lea, sa molimauina foi e le komiti sa faafoeina le taaloga i le Aso Toonai na mavae atu, aso 14 o Aperila, le tulaga matagofie tele, atoa ai ma le lagolago a ekalesia ma faalapotopotoga i le taumafaiga sa iai.
O le sini ma le autu o le taaloga, o le sailia lea o le sao o tama ma teine o le autalavou, e fesoasoani ai i le galuega o loo fuafuaina e le Faafeagaia ma le aulotu, i so latou malumalu tapuai i se taimi e le o toe mamao ona faataunuuina loa lea.
E ui ina tele au a Niu Sila sa tauva, peitai o le faaiuga ua sola ai nei le au mai Ausetalia ma le manumalo.
O le faaiuga ma le faasologa la lenei na iu i ai lea foi faamoemoe.
O le tulaga muamua, na mauaina e le au mai Melepone Ausetalia, le ANZ CORP. O le tulaga lua, na mauaina e le au mai Samoa, Fasitootai, ma o le au lea na taitai ai le susuga ia Rev Elder Lale Ieremia, o le Taitaifono o le Ekalesia EFKS.
O le tulaga tolu, na soloai ane i ai le au ua faaigoaina o le Harbour Masters, o nisi lava o uo a le susuga ia Tunumafono Pito Faalogo.
O nisi o faailoga faapitoa mo tagata taitoatasi, sa mauaina foi e le susuga ia Rev Lale Ieremia (Closest to the Pin).
O Dallas Valasi, sa ia manumaloina le faailoga o le Longest Drive, ma le Togiga sili ona matagofie (Best Uniform) na maua e le ANZ CORP.
Sa faafetaia foi e le autalavou ma i latou uma na faamaopoopoina lenei tausinioga le taitaiga faaleagaga a lo latou faafeagaiga, Rev Vaaelua Patu ma si ona faletua.
E pei ona saunoa se tasi o sui o le komiti, ‘Ua tini lo matou faamoemoe, ua taunuu ma le manuia ona o le alofa ma le agalelei o lo tatou Alii.’
