Ose taaloga pito sili ona faigata, le taaloga fou ale Samoa Events lea na faia i Savaii ile Aso Toonai.
Ole taaloga ua ta‘ua ole Sau‘ai Savaii Giants’ Race poo le Giants’ Triathlon.
Ole taaloga e tafa tolu ana tausinioga, e aofia ai le aau, tietie uila male tamo‘e e pei o isi taaloga triathlon ale Samoa Events oloo iai nei e iai le Warrior Race.
Ae ole eseesega ole taaloga ale Giants’ Triathlon, ona ole mamao.
E pito sili atu le mamao ole Triathlon lea nai lo isi taaloga Triathlon oloo iai nei i Samoa.
E 169 kilomita le mamao ole taaloga faatusa lea ile 113 kilomita le mamao ale Warrior Race. Ae o isi Triathlon e pupuu ifo.
Ole aau e 3 kilomita na fai lea i gataifale o Faga e amata i Siufaga ile fale talimalo ale Amoa Resort. Sosoo ai male tuuga Uila e 135 kilomita le mamao.
Ole uila na amata mai i Siufaga e agai atu i Satoalepai toe foi mai, ae alu faalua la i Satoalepai toe foi mai ai. Ona sosoo ai lea male tamoe, e 31 kilomita. E ono taamilosaga tailima kilomita i totonu o Faga lava.
O lenei taaloga e o taitoatasi lava, e leai ma se suiga. E toalua i laua mai fafo na malaga faapitoa mai i Samoa e faataitaia i lenei faamoemoe, auā le maketiina atu lea i fafo mo tagata taalo e fia malaga mai i Samoa e tausinio ai le tausaga fou.
Ole alii o Richard Birgander mai Sweden ma Patrick McEntire mai Amerika Samoa oi laua ia na tauva i lenei faataitaiga.
Ua faaigoa le taaloga ole Sau‘ai ona ole matautia o Sau‘ai na ta‘uta‘ua ai Savaii. E iai le Sau‘ai e igoa ia Moso lea e iai lona tulaga vae i Falealupo, ae ole isi tulagavae oloo i Fiti. A e silasila foi i faafanua o Savaii oloo iai tulagavae e lua ile ogatotonu ole motu. Ole mafuaaga lea ole faaigoa ai ole taaloga fou ole Giants’ Triathlon, poo le Sau‘ai matautia ia latou mea matautia na fai.
Na amatalia le taaloga ile vaveao ile tafa o ata, ae na faatoa uma ile ta ole fā ile afiafi. E tele faigata ole taaloga, e lē gata ile mamao ole tuuga, ae ole tiga ole tino, male faigata ole tauiviga i vaega uma e tolu.
Ae ole mea pito sili ona faigata ole malosi lea ole la male vevela.
Na amata le aau ile ‘afa ole 6 mai Siufaga i Salima toe foi mai. E 1 itula 20 minute le umi ole aau. Sosoo ai loa male uila. Ole umi ole uila e 5 itula 9 minute male 5 itula 10 minute. E lei vava mamao nei alii ile aau male uila.
Ae ole tamo‘e, o iina na eseese laititi ai i laua. Ole 31 kilomita e 3 itula 57 minute le mua ae 4 itula 22 minute lē na sosoo ai.
Ole aofaiga e 10 itula 25 minute le taumafai ale alii mai Sweden (Birgander) ae ole Amerika Samoa McEntire e 10 itula 52 minute lana taumafaiga.
Ile faaiuga ole taaloga na ta‘ua ai e Birgander, na auai ma lona aiga atoa, o lona toalua male la fanau e toalima, ose taaloga pito sili lea ona maoa‘e ua ia tauva ai. E lē gata i lea ae ole matagofie foi ole nofoaga na fai ai le taaloga ile aau, uila male tamo‘e. E ui ile vevela ae e lei popole iai.
“Ole taaloga pito sili lea ona manaia ua ou tauva ai. Ese le manaia ole mea ua fai ai le Sau‘ai Savaii,” saunoaga a Birgander. Na faaalia foi le fiafia a lenei alii ile manumalo o ia ile taaloga muamua ale Giants’ Triathlon.
Ae o McEntire, ole faatolu ai lea ona malaga atu i Samoa mo taaloga Triathlon i lenei tausaga.
Na muamua malaga i Samoa ile masina o Fepuari mole Olympic Triathlon, sosoo ai male Warrior Race ia Iulai, ae faatolu ile taaloga ale Sau‘ai.
