Na matuā faatumulia le falematamata i Dandenong Stadium i Melbourne i le Aso Toonai na tea nei, i le fusuaga a le alii Samoa o Justin Tafa 21 tausaga ma Joel Buck Masters. O le alii o Joel ua 28 ana fusuaga ae 5 faia‘ina ma e alala o ia i Melepone. O se alii ua leva ona fusu pe a fuafua atu i le alii o Justin e na o le 12 ana fusuaga ae 2 faia‘ina.
Na uma taamilosaga ma manumalo ai le alii o Justin i ‘ai, ma ua ia umia ai le fusi o le Super Heavyweight Champion a le Vasa Pasefika.
O le po foi lea sa fusu ai lona uso laititi le alii o Junior Tafa i le aai i Brisbane i le suega fusi o le CMT 7 Caged Fight, poo le fusu i totonu o le pa. Na fusu le alii o Junior Tafa, e 19 tausaga le matua, ma le alii o Jacob Francis mai Gold Coast. E lei atoa se minute i le taamilosaga 1, ae lavea loa le alii o Jacob Francis i le tu‘i malosi a Junior ma palasi ifo i lalo, ma lē mafai ona toe tu i luga, ma taofia ai loa le fusuaga.
Vaaia pea le maoae ma taumafaiga a lenei foi auuso e to‘a 4 ma o loo faaigoaina o le “Team Tafa”, Gerard, Justin, Junior ma lo latou uso laititi o Pati.
O le alii o Justin o loo ia umia i le taimi lenei ni fusi se lua, Australian ISKA Super Heavyweight Champion, ma le Queensland ISKA Super Heavyweight Champion, lea la ua faaopoopo atu i ai ma fusi o le Vasa Pasefika r pei ona manumalo ai i le Aso Toonai na mavae nei.
Ae o le alii o Junior o le lona tolu lea o lea auuso, o loo ia umia foi fusi e 2 i le taimi lenei, Australian MASA Superheavyweight Champion lea sa manumalo ai mai le la fusuaga ma le alii mai Sydney i le masina o Me i le tausaga nei. O loo ia umia foi le fusi o le Setete o Queensland, Qld K1 Superheavyweight Champion, ma o le po o le Aso Toonai na se‘i mavae nei lea na ia toe manumalo ai i le fusi o le Caged CMT i le aai o Logan i Brisbane.
O lea auuso o loo aumau ma lo latou tina i Ausetalia, o se alo e faasino i le Susuga i le Sa‘o le tamā ia Fuaolefau Le Pouli Pati Tafa ma le tina ia Tiumaleovao mai le alalafaga o Mulifanua, o se tasi o tamā sa lauiloa i lea foi faagatama ma sa avea o ia ma siamupini i le Tivoli i tausaga ua mavae.
Sa ta‘ua e Amanda o le tina lea o le lenei auuso toafā, le agaga faafetai i le Atua i le malosi o loo foai i le fanau auā le feagai ai ma taaloga. O loo iai le faamoemoe o le a alo atu le alii o Justin i le fusi o le lalolagi (World Title) ia Aperila i le tausaga fou 2016.
Faamatalaga na tuuina mai
