Ua mae‘a le fusuaga a Joseph Parker i le Aso Sa na se‘i mavae i le paga mamafa ma se faaiuga faafiafia loto i le maimoa a Samoa ma le lalolagi na silamio i le tu‘i oti i le tulimanu na agiagia ai le tagavai o Niu Sila ma Samoa i Sands Casino Bethlehem i Philadelphia, manumalo ai Parker i le taamilosaga tolu.
O le sefulu ai lea o taaloga faapolofesa a le alo o Samoa, o le iva o fusuaga na manumalo uma ai i le tu‘i oti, ma o se tulaga lelei lea mo le talaaga o lana fusu faapolofesa. O le mae‘a ai la o le fusuaga ma Keith Thompson i le faaiuga o le vaiaso, ua see atu ai Parker ua 22 tausaga o lona soifua, i le tulaga 15 o faatulagaga o tagata fusu o le fusi a le WBO.
Na maua i tala mai upega o fesootaiga le asiasi o Larry Holmes i le faletalimalo sa nonofo ai Parker ma lana aumalaga i le po ae malama le taeao o lana fusuaga, maua se avanoa e valaaulia ai o ia ma lana faiaoga Kevin Barry e fai taumafataga faatasi ma lona aiga.
O Holmes o le siamupini ta‘uta‘ua lea i le vaitau o le tausaga e 1978-1985, o se tasi o tagata fusu e logologoā tala e numera tasi i le so‘a malosi, peitai na ia ta‘ua, ‘o Parker e lelei lana fusu ma o se alii talavou e iloa fusu’. Sa avea lea feiloaiga maualuga na faailoa i ai nisi o metotia a Holmes e fesoasoani i lona faasauni atu i lana fusuaga.
Ua matuai telē se avanoa e faalauiloa ai le taleni fusu a lenei alo o le atunuu, amuia foi ia, i le fusuaga na se‘i mavae, ona o le tulaga na faaalu ai i luga o televise NBC i totonu o Amelika.
E lei iai se taimi umi na faasolo ai le fusuaga e pei ona maitauina i luga o ala ata, auā na manino mai lava i le taamilosaga muamua le vave o le gaioi a Parker ma le telegese o Keith Thompson, tele o taimi e na o le ‘alo‘alo lava i tua, ae taugā lava le sasau a Parker.
O le taamilosaga lua na toeitiiti lava maua lelei ai le faalava o le agavale a Thompson i le ulu o Parker, ua manatu nisi ‘ai ua avea lea ma pogai o le lē toe tuu avanoa loa o le tama Samoa, ae fai motu loa le taaloga i le taamilosaga tolu. E na o le lua minute ma le fā sefulutasi sekone le umi talu ona amata le taamilosaga tolu, ae osofai loa Parker, taumatau, agavale e lelei uma itu e lua, solomuli Thompson ae apakaki loa le auvae, lue le ulu ma see i le tulimanu.
Ua leai loa se toe faatali o Parker ae alu motu loa, so‘a, tu‘i, apakaki malosi ae palasi loa i lalo Thompson ma taofia ai le fusuaga, manumalo Parker i le tu‘i oti. O se taaloga mataina ma vave uma, ae faamalieina le matamata i le faatinoga o le fusu a le tatou tama, malosi tele le fusu a le tama ma ua alu aoga foi le tupe na totogi ai Sky e matamata lana taaloga.
O lea ua faamoemoe le isi fusuaga lata mai a Parker, faia mai i Aukilani, o le a fetaui ai ma Sherman Williams mai Bahamas ia Oketopa i le tausaga nei, ma o loo saili e le DUCO Event o le pulega o loo faalauiloaina fusuaga a Parker, se avanoa ma se tagata fusu o loo i le numera sefulu pito i luga e mafai ona taaalo ma Parker i le faaiuga o lenei tausaga.
