Na manumalo le uso laitiiti o Joseph Parker le alii o John Parker i lana fusuaga faapolofesa muamua na fetaui ai ma Ratu Dawai o Kalaiesetete. E toatasi le faamasino e tutusa lana faaiuga, ae o isi faamasino e toatolu na manumalo John Parker ia latou i ‘ai.
Ile taamilosaga muamua, na vaaia ai le sa‘o o tu‘i a Parker na maua ai le auvae o Dawai. E lei solomuli lona taumafai, ma mataala foi lana fusu ile tele o taimi. Peitai, na faapea ona tali mai e Dawai tu‘i a Parker, e uma le taamilosaga muamua e tele lava ina lavea Dawai.
Faapea foi ile taamilosaga lona lua, ae ole ogatotnu ole taamilosaga na lavea ai le isu o Parker ile so‘a a Dawai ma toto ai. E ui e lē ose manu‘a tuga, ae na vaaia lava le mu o foliga o John Parker ina ua lavea.
Ole lavea o John Parker na toe ala mai ai le fusu ale alii, na vaaia le malolosi o ana auato e pei ose faatea kilikiti, e ui ina misi le tele o auato, ae o isi foi na lavea lelei ai le alii o Dawai ma vaaia ai le solomuli i tua.
Ole taamilosaga e fā, ole vaaiga lava lea e tasi na iai, na faigata ia Dawai ona saili mai sona avanoa e ui ose alii tino lelei ma umi Dawai, ae na solomuli lava ile malosi ole osofai atu a John Parker.
Ile la talanoaga ma Monty Betham ile faaiuga ole fusuaga, na ia ta‘ua ai le faaletonu ole laufali, ma e lei fusu foi e faamoemoe ise faaiuga a faamasino ae na fusu lava ma lona mautinoa e manumalo. Na faaseā ai Parker ile faaiuga ale faamasino lea na tutusa ana ‘ai.
Ae ole vaaiga atoatoa ile fusu a John Parker, e umi le auala ole a ia savalia e au ai ile tumutumu ole taaloga. E ui na ia manumalo, ae e telē foi male galuega e ao ona ia faia mo fusuaga o loma. Pau le mea, ole lelei ua maua lana manumalo i lana fusuaga faapolofesa muamua Ae ise vaai ile tulai mai o lenei foi alo ole atunuu, e telē sona lumanai ile taaloga peitai, e telē foi se galuega e tatau ona fai ina ia siitia ai pea lona taumafai ma ā‘ea le tumutumu e pei ona saofai mai ai nei lona uso matua o Joseph Parker.
O John Parker oloo koleni nei ese tasi foi o tamalii iloga o Samoa ile maea, o ia foi ole uluai Samoa na umia le siamupini ole lalolagi, le susuga ia Maselino Masoe.
