Manatua ane le igoa lenei Jai Tapu Opetaia Pro Boxer ole Cruiser Weight. Ole tasi lenei o alii Samoa ua amata lana malaga i faipelega ma fusuaga faapolofesa.
Ole Aso Faraile ua tea nei ile Gym 1 i Tuanaimato na fusu ai ma Togasilimai Letoa o Lalomauga ile fusuaga faapitoa ole po, ile Fight for Marist II. E lei atoa le fā o minute ole fusuaga ae manumalo Opetaia ina ua faalua ona pa‘ū Letoa.
Na amata lava faaletonu o Togasilimai ae lei amatalia le fusuaga. E lē o ia na tuu e fusu ma Opetaia, ole isi alii fusu o Tony Fereti, ole paga lea a Opetaia. Ae ile vaiaso ole fusuaga ae faamavae loa ma Fereti, fai mai o manu‘aga ua lē mafai ai ona fusu, ona sue ai loa lea ma se tasi e fetaui ma Jai Opetaia.
E lē toatele ni tama fusu i Samoa e talafeagai ma tagata fusu faapolofesa mai fafo. O Togasilimai Letoa na oso faalava e sui tulaga ia Fereti.
E ui i lea, ae na vaaia ai lava le matuā lelei tele o lima ma le vaai ale alii Samoa mai Ausetalia. Ole taamilosaga muamua (R1) ile so‘a malosi ile lima taumatau ma le tu‘i masau ile agavale. E na‘o tu‘i lava ile tino na sao a Togasilimai ae e lei faaletonu ai le fusu mai a Jai Opetaia.
Na palasi Letoa ile faaiuga ole taamilosaga muamua, ae na toe vave tu i luga. Ole minute muamua ole taamilosaga lona lua ae toe palasi Letoa ile maea, e lei faatali le laufali ae taofi loa ma le fusuaga. Manumalo Jai Opetaia ile TKO ile taamilosaga lona lua.
Ole 9 ai lea o manumalo a Opetaia, 6 manumalo ile TKO. Ole fusuaga a Opetaia ma Letoa na faauma ai iina ma le polokalame na auai ai alii fusu mai Niu Sila, Ausetalia, Amerika Samoa, Tonga ma Samoa nei.
Na manatua ai foi ma le afioga ia Tupua Fred Wetzell lea na tuumalo ile masina o Tesema, auā o ia na lagolago malosi i taumafaiga a Malisi ile atinaeina ole Marist International Sevens, aemaise ai le polokalame fou ua aafia ai nei ma Fusuaga.
Ole ‘au a Samoa na mua ile tele o ana Pine Auro. Na iloga ai le taumafai a Filimau Hala ma Aukusitino Fuatagaumu. E tasi le fusuaga a tamaitai na iai, ole paga lea a Repeka Daniel na fusu ma Faafetai Iosia.
Ae ole lumanai ole alii lea o Jai Opetaia e iai le faamoemoe a lona faiaoga, o lona lava ia tamā o Tapu Opetaia, ole a oo ise tulaga maualuga i totonu ole taaloga ile lalolagi. Ole malaga muamua mai lenei o Jai ile atunuu o ona mātua lea e mai le afioaga o Lalomanu ma Apia.
O Jai na fusu mo Ausetalia ile Olimipeka i Lonetona 2012. O ia ole alii fusu pito sili ona laitiiti na fusu mo Ausetalia. E na‘o le 17 ona tausaga ile taimi ole Olimipeka i Lonetona. I lana uluai fusuaga na feiloai ai ma le numera tasi ale Paga Mamafa Teymur Mammadov o Azerbaijan. Na faia‘ina ai Opetaia ise fusuaga mataina ile lelei o lana fusu a‘o talavou lava o ia.
Ina ua fai le faaiuga a Jai Opetaia e fusu faapolofesa ile 2015, na matuai faanoanoa ai tele Ausetalia, auā sa iai lo latou faamoemoega, o Jai ole isi lea pine auro a Ausetalia ile Olimipeka. E pei ona faailoa ele alii tusitala o Daniel Lane ile Sudney Morning Herald, “Sa iai le faamoemoe ole malo Jay mo lana pine auro muamua ile Olimipeka, peitai, ua mamulu lea avanoa ina ua liliu o ia e fusu faapolofesa”.
E lē ose mea fou le faipele ile olaga o lenei alo ole atunuu, auā o lona tuaa Tapu Opetaia na fusu faapolofesa i New South Wales, Ausetalia 1999-2001. E toatele foi ona tausoga o lona tamā sa taaalo foi ile taaloga faipele.
Jai Tapu Opetaia
Fusuaga faa-Polofesa
2017, 10 Fepuari, SAMOA Manumalo vs. Tagisilimai Letoa TKO
2016, 23 Tesema, NSW, AUST Manumalo vs. Isileli Fa TKO
2016, 9 Setema, NSW, AUST Manumalo vs. Peter Brennan KO
2016, 14 Oketopa, TASMANIA, AUST Manumalo vs. Uria Afamasaga TKO
2016, 22 Iulai, NSW, AUST Manumalo vs. Sefo Falekaono TKO
2016, 23 Aperila, MEXCIO, Manumalo vs. Orlando Vasquez PTS
2015, 28 Novema, QLD, AUST, Manumalo vs. Randall Rayment UD (Unanimous Decision)
2015, 14 Aokuso, VIC, AUST, Manumalo vs. Rob Manual TKO
2015, 1 Aokuso, NEW ZEALAND Manumalo vs Isileli Fa UD (Unanimous Decision)
