E alu le tauvaga lenei i le tausaga atoa, ma e fai ma asiasia e le Matagaluega o Tina ma Tamaitai, Atina‘e o Nuu ma Aga Fesootai. E asia le mamā o lumafale ma tuafale, o le tausiga o le vao ia mautinoa e lē ola laulaua, o togalaau ua faamatagofie ai luma maota o le atunuu.
O le leai o ni meaituaolo e vaaia auā ua mautu lo‘ilo‘i o aiga. O le mamā o gataifale atoa ai vaitafe. O maota ma laoa isi vaega aemaise foi le mamā o fale lē ta‘ua ina ia unai le soifua maloloina.
O tausaga ua mavae na amata ai e le Pulega o Tagata Tafafao maimoa mai i fafo, lenei tauvaga, o se taumafaiga e lē gata ina ia tumau le matagofie o Samoa ma unai ai le soifua manuia o tagata ae o se faiga foi ua faatosina atili ai tagata tafafao maimoa mai i fafo.
O le vaitaimi lenei ua tulai mai le matagaluega o Mataupu tau Tina ma Tamaitai, Atina‘e o Nuu ma Aga Fesootai latou te faaauau lenei galuega tele.
O le faafaigofie ona faatino o lenei tauvaga i lalo o le suiga ua iai nei, o loo faaauala mai i sui o le malo i afioaga, e lē gata i le itupa o alii e pei ona iai le pulenuu ae faapea foi i sui o tamaitai ma sui o tupulaga.
O lo latou sao i le fesootai atu o manaoga o le Malo ma ana atinae i afioaga ua tuu atu i lea itu o le atunuu latou te faatautaia. O le fesootaiga tonu lenei na saunoa i ai le alii Minisita le tofa Tolofuaivalelei Falemoe Leiataua ina ua faatino le laugatogi o afioaga aupito i matagofie o Samoa mo lenei tausaga.
Ua taualuga ai foi galuega o le 2014 i totonu o le tele o afioaga lea e iai sui nei. O le tauvaga lenei na vaevaeina i vaega e tolu. O le tauvaga o afioaga i Upolu nei lea aofia ai ma Aiga i le Tai, atoa ai ma le tauvaga o le motu tele i Salafai atoa ai ma le tauvaga o afioaga lē mavae i totonu o Upolu.
O le afioaga la lea na tulaga muamua ma maua le tinoitupe e $3,000 ma le meaalofa mai i le kamupani telefoni o le Bluesky Samoa o le afioaga o Falefa. O le tauvaga lea i afioaga mavae. O le mafutaga a tina o le nuu ua faatautaia lava le faamatagofieina o Falefa e ala i asiasiga ma galuega faamamā ina ia laugatasia uma aiga ma le matafaioi e faatino auā lenei taumafaiga ma o le faamatalaga a tina o le mafutaga, o le a taumafai e tatao lenei galuega.
O le isi afioaga na maua le faailoga e $1,000 ma le meaalofa a le Bluesky Samoa o le nuu le mavae aupito sili ona matagofie lea na tauaao atu ia Aele. O Vaisa‘ulu e pei ona ta‘ua e ona sui, e lē fou i le manumalo i lea tauvaga ma o se galuega ua tutu faatasi ai le pulega a alii ma faipule ma tina e faatino lea foi la ua toe pale mai ai i le manumalo e pei ona maua foi le $3,000 ma le meaalofa a le Bluesky Samoa.
E tele isi afioaga na faapea ona faamanuiaina ma o le auga lava ia maua le ola tumama ma le fiafia o nuu e faamatagofie o latou siosiomaga. O le faafetai a le Matagaluega na ave i sui nei o le malo ua faapea ona lagolago malosi i atinae faapea ua manuia uma ai lava tagatānuu o afioaga uma.
