Manumalo Faimalotoa Kika Stowers tofi Faipule Gagaifomauga Nu. 1

Sa tele tala feaveai ma tala tuu mumusu a o loma le palota laitiiti a Gagaifomauga numera muamua i le sui o le a manumalo, a o lea ua faatoa iloa nei le auro moni i le afi ina ua aumai le faitauga muamua o lea palota laititi na faia i le Aso Faraile ua mavae, ua manumalo le sui tamaitai sa tauva mo le HRPP le tofa Faimalotoa Iemaima Kika Stowers.
O lea ua taunuu ai ma le alagaupu masani a le atunuu, E au lava le inailau a tina ma tamaitai. E toafā alii ae filo ai ma le tofa Faimalotoa i sui e toalima na taufetuli i le palota laititi.

Na maua mai se molimau i le Aso Tofi a o lumanai le palota i le Aso Faraile na tea nei, o loo malosi faatosina i nuu ma afioaga o le itumalo i Savaii, ma o le itu sili lea ona popole i ai sui tauva e lē tele seleni ae saili lava le manumalo i le finagalo lagolago o tagata palota.

Peitai o na faatosina uma ma seleni na sasaa e nisi sui tauva mo le tauanauina o palota, o le faaiuga o le palota laititi a Gagaifomauga numera muamua ua taoto mai ai ua liliu le lagolago a tagata palota o le itumalo i se tamaitai e tulai mai e avea ma tofi faipule o le itumalo, e faaauau le lima tausaga o le paeaiga sa tauave e le tofi ua tuumalo le tofa Tuilo‘a Anitelea Tuilo‘a.

Ua toe tumau ai le nofoa o le itumalo ile HRPP ma ua taunuu ai ma le finagalo o le taitai le afioga i le Palemia a o loma le palota laititi, e toe manumalo mai lava se sui o le vaega faaupufai.
O le sui tauva e toatasi o le Tautua Samoa na tulaga lima mai sui e toafā o le HRPP na latou tauva. O le faatulagaga o palota i le faitauga e lei aloaia mo sui taitasi.

O Faimalotoa Iemaima Kika Stowers e 268 palota na ia maua. Pito i ai le isi sui o le HRPP o Lavea Natoe Ieti e 232, o le isi HRPP o Ga‘iga Aukusitino poo Ga‘iga Tino e pei ona silafia lautele ai sa avea muamua ma faipule o le itumalo e 185 ana palota, ma Taito Vaea Muese Tanu e 198. E fā palota e lei faaaogāina ona sa le lelei ona fai ae o le aofaiga atoa o tagata na palota 989.

O se aofaiga toatele pe a fua i le aofaiga o tagata i le lola palota a lea itumalo e 1,164. O lona uiga e 175 tagata e lei palota. O le amataga o le vaiaso nei ua e faasilasila aloaia ai le taunuuga o le palota laitiiti e le Komesina o faigapalota, ae o le vaai i ai i le aofaiga o palota na maua e sui taitasi e mamao palota o loo manumalo ai Faimalotoa.

O le Aso Lua o le vaiaso nei o loo usuia ai le Palemene lea ua faamoemoe e faatauto ai ma le faipule filifilia fou o Gagaifomauga numera muamua. O Faimalotoa Iemaia Kika Stowers ua leva tausaga o galue i le Malo o se tagata faasalalau i le leitio o le 2AP ma sa avea ai foi ma Faatonu Sili o le matagaluega o Faasalalauga sa pulea le leitio a le Malo.
“O Faimalotoa Iemaima Kika Stowers e 268 palota ua ia maua”