I le aso 1 o Aukuso i le tausaga nei, o le a matuā vevela ai le tauvaga poo tuuga i taaloga e 3 o le tuuga aau, miliga uila ma le miliga tamoe, i le mae‘a ai ona avea ma taaloga faavaomalo.
I le susulu manaia o le la i le taeao o le Aso Toonai, ae o loo vevela le tauvaga i le va o tama taaalo i Mulinuu, o le tauvaga tafatolu o loo lagolagoina malosi e le kamupani a le BlueSky i Samoa.
Sa iai lava ni mea sa faaletonu i le tauvaga e pei o le leaga ai o latou uila a o alu le tauvaga ae sa mafai lava ona faaauau seia oo ina taunuu i le tini.
Sa matuā faigata le faaiuga o taaloga mo le au pito i luga, ae sa manino lava le mata o le vai e ave uma e le alii o Darren Young ona sa ia ausia le 750m tauvaga aau, 20km miliga uila, ma le 4km tuuga tamoe i totonu o le 1 le itula ma le 13minute, 11sekone. Sa matuā maoae le maualuga o le taumafai a lenei alii o Darren Young.
Ina ua manino le siamupini ua ave e le alii o Darren Young, ae ua maua ai foi ma ē ua tulai mai i le tulaga 2 le alii oMalaki Iulio ma le tulaga 3 le alii o Palasi Peniliva o le I‘a Lele mai Saoluafata. Sa vaaia le sui faafuasei o le malosi ma le taumafai a le au toalua lea i le tulua ma le tutolu ina ua oo ane i le faaiuga o le taamilosaga lona 2.
Ua matuā fiafia le coach o le au taaalo mai Saoluafata le susuga ia Donald Kerslake ona o le manaia ma le faamalieloto o le taumafai a lana au taaalo.
Ae sa matuā ofo uma ai loa i le tulaga 4, na tulai mai ai le tagata pito i sili ona laitiiti o le tauvaga ma ua sili atu lana taumafai ia i latou sa masani ona tulaga lelei i lenei taaloga.
O le alii laitiiti lenei e 11 ona tausaga ua matuā alualu i luma lona lelei i le faatinoina o taaloga i ni nai vaiaso ua mavae atu.
Ua avea nei le alii o Darren Young o se fetu pupula ma o ia o se faataitaiga lelei mo le au tauva ona o le maoae o lona tulaga i le faatinoina o taaloga. Ua siitia lona tulaga i le tuuga aau, ua faasolo atu i le tuuga uila faapena foi i le tuuga tamoe e pei ona iai i le taimi o le tauvaga.
Ua avea ai nei lenei alii o se tasi ua taitaiina le latou vaega ma e lē na o le tulaga pito i luga o loo ia lu‘iina ae ma isi tuuga e 2 o loo totoe, o se vaaiga uigaese ma le manaia o loo taoto mai i tua atu o le taumafaiga a lenei alii o Darren Young.
E 2 au a le Tanoa Tusitala na maua tulaga lua pito i luga, tulaga 3 le au a Le Amosa Duo o Teofilo Molioo sui mai fafo i le tauvaga aau, ma le alii o Steve Nimarota, ma le tulaga fā o le au mai Saoluafata.
O le aso 23 o Me ma Iuni ua faamoemoe e toe faia ai lenei tauvaga, tuuga aau ma le tuuga tamoe.
