Manumalo Ami Pepe i Tauvaga lauga i Aukilani

Toastmaster New Zealand

O loo matauina pea le laalaa i luma o le tomai ma le agavaa o le susuga ia Amituanai Timoteo Maneta Pepe, i le itu tau failauga e pei ona iai se tauvaga na faia i le aso 9 o Mati 2013, lea na manumalo ai le Susuga Amituanai, i se tauvaga lauga na faia i Botany i totonu o Aukilani, i totonu o le faalapotopotoga o le Toastmaster New Zealand.

O lea la ua toe avea ai foi Amituanai ma sui e tauva i le tauvaga faaiu e sue ai se siamupini o Aukilani i le masina o Aperila i le tausaga nei, lea e faia i Mt Albert Aukilani. O tauvaga lauga o loo faagasolo mo le taimi nei, e faaautu lea i ni mafaufauga e faaosofia ai ni lagona lelei ma le fia alualu i luma o le tagata faalogologo (Motivational and Inspiration Speech).

E le o se taimi muamua lea ua filifilia ai Ami e fai ma sui tauva i totonu o lenei faalapotopotoga o le Toastmaster.  Na avea foi o ia ma siamupini o Aukilani, ma oo atu ai i tauvaga faaiu i totonu o Niu Sila i Hamilitone i le faaiuga o le tausaga ua mavae atu.

O lenei faalapototoga o se vaega e fesoasoani tele lea i tagata o loo fia faaleleia atili le tautala ma lauga i luma o tagata lautele. O le tele o nisi o aoaoga i totonu o lenei faalapotopotoga, e fesoasoani lea i tagata ina ia avea ma taitai i totonu o fale faigaluega, matagaluega, asosi ma faalapotopotoga, ekalesia ma soasaiete i soo se atunuu.

O le Toastmaster o se faalapotopotoga i totonu o le lalolagi atoa, ma ua molimauina ai le toatele o tagata ua avea ma taitai e pei ona ta‘ua, ona o le tele o ni aoaoga maoae ua mafai ona aoaoina mai ai.

O se fautuaga a Amituanai e faapea, e tatau tele i tagatānuu o Samoa ona faatāua lenei faalapotopotoga ma nei aoaoga lelei mo le alualu i luma o le soifua fia taumafai o tagata i le taimi nei.

Auā e mafai e nei avanoa lelei ma ona aoaoga faatulagaina, ona faaosofia oe e faataunuu le tele o ni sini ma ni faamoemoega o loo e fia galue atu i ai mo le lumanai manuia.

Fai mai se faamatalaga a Amituanai, e ui ina toatele i papalagi lenei faalapotopotoga, ae lē mafai lava lona fiafia e ta‘u ta‘u atu, o ia o le Samoa.

O se e faamanuiaina mai i le tauvaga a Aukilani, o le a fai ma sui o Aukilani i le suega siamupini a Niu Sila atoa e faia i Ueligitone ia Me o le tausaga nei.  O ai e manumalo mai i le masina o Me i Ueligitone, e fai ma sui o Niu Sila atoa i tauvaga faalevaomalo, e faia i Amerika ia Aokuso o le tausaga nei lava.

O se sini ma se faamoemoe ia Amituanai, ina ia avea o ia ma se Motivational Speaker, ma se Tusitala Samoa. Momoli atu ai faamanuiaga ma moomooga a le Samoa Times, i le Susuga Amituanai, ina ia taulau manuia lona faamoemoe, o le a alo atu i ai i le masina fou, o Aperila.