Ua faatino le finagalo o itumalo faafaipule o Safata ma Faleata i Sisifo i faigapalota laiti sa faagasolo i le Aso Faraile na tea nei 14 o Me 2010, ma ua manino mai i le faiga filifiliga a le itumalo o Safata le toe tumau pea o le afioga Palusalue Faapo II i le isi tofi faipule o nofoa e lua o le itumalo i le Palemene.
Ae o le itumalo faafaipule o Faleata i Sisifo ua manumalo mai ai le sui faatu mai le afioaga o Toamua, Puipaa, Safune, ma Saina le tofa i le Igoamatua, Ale Vena Ale.
O Safata e 12 fale palota lea ua manumalo ai Palusalue Faapo II i le aofaiga e 979 palota na ia maua, pito i ai le sui tauva le afioga Auseuga‘efa Tuvaifale Vaasatia Poloma Komiti e 921, ma le sui tauva o Manu‘alesagalala Enokati Posala e 836 palota na ia maua.
O Auseuga‘efa ma Manu‘alesagalala o sui faatutū o le HRPP ae o le afioga Palusalue Faapoo II o le sui tauva mo le Tautua Samoa Party.
O Faleata i Sisifo e 7 falepalota lea ua manumalo ai Ale Vena i le aofaiga e 1,045 palota na ia maua, pito i ai Lealailepule Rimoni e 963, ma Ulugia Petelo e 748 ana palota.
O Ale ma Ulugia o sui faatutū a le HRPP ae o Lealailepule Rimoni o le sui a le Tauta Samoa.
I le molimau lava ia i le tulaga na iai le faigapalota laititi mo ia itumalo faafaipule sa taufai malolosi le lagolago a tagata palota i sui tauva uma e fua i le aofaiga o palota na maua e sui i fale palota taitasi.
O se tulaga mataina le molimau i le faiga palota a Safata ona e tau fai toatele uma tagata palota e lagolagoina le Tautua Samoa faapea foi le HRPP, ma e faapea foi i le palota laititi a Faleata i Sisifo.
E ono mafai ona faapea, e faigata foi le tauvaga a le Tautua Samoa o se vaega faaupufai faatoa lesitala ma faavae, ma le HRPP i le palota tele o le tausaga fou.
O le itumalo o Faleata i Sisifo e 2,756 palota na faaaogā ae 18 palota e lei faaaogāina ona sa lē lelei ona faia.
E 12 palota faapitoa poo special votes na faia i lea itumalo faafaipule.
O Safata e 2,736 palota na faaaogāina, 13 palota sa lē lelei ona fai, ae 7 palota faapitoa na faia ai. O le faaiuga o lenei faiga filifiliga i le faitauga muamua e lei aloaia poo le preliminary result o le a faato‘ā mafai ona faamautuina pe a mae‘a le faitauga aloaia ma faasilasila mai ai e le Komesina o faigapalota le taunuuga aloaia o lenei faiga filifiliga.
O le faaiuga o lenei palota ua tulai mai ai o le Tautua Samoa Party ua toalua ona sui aloaia, peitai e le mafai ona faalagiina ma aloaia i totonu o le Palemene ona e manaomia le toafitu o ni sui faipule o se pati e aloaia ai i le Palemene.
O lona uiga e mafai lava ona faaaogā e sui faipule o lea pati le igoa o le Tautua Samoa i fafo mai o le Palemene.
Ae mo le HRPP ua faaopoopo atu le isi nofoa i le 36 o nofoa o iai nei ma maua ai le 37 o sui faipule o loo lagolagoina lea vaega faaupufai o loo tu pea i le tauaveina o pulegamalo a le atunuu. O le tauaofiaga a le Palemene i le aso 28 o le masina nei o le a faatauto ai sui faipule filifilia o Safata ma Faleata i Sisifo.
