O le viiga ma le faaneetaga i le Atua ina ua aulia mai e le tamā afioga ia Tuifaasisina Eneliko Letelemaana le atoaga o le 70 tausaga o lona soifua.
O upu o la le tusi, o le aso lenei na faia e le Atua tatou te olioli ma fiafia i ai, ona ua aulia mai i le manuia e le tamā nei tausaga e tele o lona soifua.
O le suuga i le faafeagaiga ia Tauiliili Pio Letelemaana sa taitaiina le faigalotu ae lagolagosua i ai le susuga ia Eneliko Letelemaana.
O le afioga ia Toleafoa Esoto Letelemaana o le alo faasino i le susuga i le faafeagaiga ia Tauiliili ma le faletua ia Paese sa fai ma Fofoga o le aso (MC), ae o le tofa Malagaoma Lose sa fetalai e faafetaia aiga ma uo sa afifio mai, ma momolia se mealofa mo le auvalaaulia.
O le hall a le Valentines i Manukau sa faataunuu ai lea faatasiga matagofie. O le afioga ia Tuifaasisina e mai le alalafaga o Satuimalufilufi, o se alo e faasino i le afioga Letelemaana Mikaele, tina ia Tuluvao o le alo o Saipaia o Satuimalufilufi lava, ua maliliu uma i laua.
Sa tele molimau ma faamanuiaga i le soifuaga o le tamā, sa molimau i ai aiga ma fanau paolo ma ē masani o ē sa faapea ona auai. Ona faaiuina ai lea ma le manuia lea mafutaga matagofie i le tatalo faafetai na saunia e le susuga i le faafeagaiga.
