Ole mau lea oloo taualuga pea ile lagona ole faletua ia Shearer Maiava ma lona aiga, ina ua faamalolo ele Atua lona ma‘i kanesa ile susu e pei ona maua ai i Sini Ausetalia. Ma o lona talitonuga foi, a iai Iesu ise aiga ose aiga fiafia e mauaa ma mausali lona faavae, o ā lava fita ma faigata e oo mai, e lē mafai ai ona maluelue faitotoa ole faatuatua auā ua faavae mea uma ile Atua.
Ole aso 6 o Iuni ile tausaga ua mavae 2016 na iloa ai ele faletua ia Shearer le fula oloo oso i lalo o lona aoao i lona itu agavale, ma ia alu ai loa ma vaai lana fomai poo le ā lea ma‘i ua oso ai. Ae ina ua fai lana siaki ma fesilisili ai fomai pe na ia lagona le tiga ole fula, ae na ia tali iai e leai, na toe fesili foi iai le fomai pe nate iloa e lua vaega ole fula oloo i totonu o lona tino, ae tali foi le faletua e leai.
Peitai na uma ona fai togafitiga ma faailoa ane iai e fomai ia Shearer o ia ua maua ile kanesa ole susu. Ma sa faafaigata ona talitonu lenei faletua ile tala ua tuuina mai ona e iai lona talitonuga e lē maua ia i lea gasegase. Ma ole taimi lea sa faatonuina loa e fomai e tatau ona fai lona taotoga semanu o la e laitiiti a‘o lei sosolo foi le ma‘i.
Ina ua ia maua lea faamatalaga na ia vili loa i lona toalua ia Neil Maiava ma faamatala iai le tala lea ua aumai e fomai.
Na faafaigata ona fai se tala a lona toalua ile telefoni ona ole lipoti lea ua aumai, ma ole taimi foi lea sa vave manava ai loa lona toalua ae alu ane ile fale se‘i tausoa faatasi tiga ua lagona e lona toalua.
Na ia logoina mai ona mātua i Niu Sila le tamā ia Failauga Pule ma le tina ia Suega Fialelei Pule ma faamatala iai lagona ua ia mafatia ai, ae sa faateia foi ona mātua ile tala ua aumai.
E leai se isi auala na lagona uma e lona aiga faapea le tuaa o Neil le tamā ia Maiava Sootaga oloo i Samoa ile taimi na soo ai le tala ile ma‘i ua maua ai Shearer, na ole tutū faatasi i luma ole Atua e ala ile anapogi ma le tatalo e ala ile faamalologa ale Alii e toe faafoisia ma faaatoatoa ai lona malosi.
Ole aso 14 o Iulai na faatonuina ai e fomai e tatau ona fai ai lona taotoga, ma sa faatinoina lava lea vaega ile aso e pei ona faatonuina mai. Na mae‘a lona taotoga ona faasolosolo loa lea o ana kimo (chemotherapy) ile aso 14 o Aukuso seia oo mai lava ile aso 14 o Tesema ile faaiuga ole tausaga.
A‘o feagai Shearer Maiava ma ona togafitiga, sa lē misi le malaga o ona mātua i Ausetalia e tapuaia ona togafitiga, e faaono ona fai ana kimo, ma o lana kimo mulimuli lea sa fai ile aso 14 o Tesema ma ua ia lagona lava ua manuia ma maua lona malosi atoatoa mai le Alii.
Sa ia lagona le lototele a‘o fai ona togafitiga ona sa ia talitonu oloo taufai tatalo atu ona aiga faapea aiga o lona toalua, o uo ma ē masani a‘o iai i ma‘i ole tino.
Ole faaiuga ole tausaga na malaga mai loa i Niu Sila nei faatasi ai ma lona toalua ma le la fanau e toalima e feiloai mai i mātua ma aiga sa tu‘i atu le mulipapaga ma nofo tatalo atu a‘o feagai ai ma togafitiga o lona ma‘i.
Ole aso 23 o Tesema na faia ai loa se fiafia tele i aiga na lua, faapea o uo ma ē masani ile Tausala Club i Magele e fiafia uma ai aiga e faafetaia ai le alofa ma le agalelei ole Atua, ona o auala ma faasinomaga na auala mai i fomai ua mafai ai ona foia le ma‘i kanesa sa ia Shearer. O lagona ole fiafia sa vaaia i loto o tagata uma sa faatumulia ai lea afiafi ae lē gata i lea ole faletua ia Uini Lauina Enari sa malaga mamao mai lava i Samoa ile fia auai ile molimauina ole alofa ole Atua ia Shearer ma Neil ma le aiga.
Ole tofa ia Tiatia Tila Falemoe sa ia taitaiina le polokalame ile tatalo ona saunoa lea ole fofoga ole aso le susuga ia Seuamuli Sinave e faafeiloai le mamalu o le auvalaaulia faapea aiga na lua, ae sa vaavaalua lava ma le faletua ia Shearer Maiava.
O faafiafiaga eseese sa molimauina ai le matagofie ole faamoemoe ina ua faafiafia ai le susuga ia Vaniah Toloa faapea le susuga ia Edwin Pita. Na momoli le agaga faafetai ole susuga ia Neil Maiava ma Shearer i o laua aiga faapea uo ma ē masani ile tapuaia ma le nofo tatalo lea ua toe maua mai le malosi mai le Atua ma ua leai foi ni ma‘i ole tino ona ole tutū faatasi o tagata uma ile faatuatua ma le talitonu ile Atua.
Ae ole faamalosi foi lea a Shearer mo le mamalu ole atunuu e aua ne‘i nofoai, ae tatau lava ona o e vaai le fomai auā ole kanesa e lē faatuaoia se tagata e maua ai. Ma e fautuaina ai lava tagata e tatau ona fai le siaki i tausaga uma. O Shearer ole lona 3 ole fanau ale tamā ia Failauga Pule ma le tina ia Suega, ae na‘o ia foi le teine. Na malaga i Ausetalia ile 2013 ma nonofo ai auā lava manuia mo aiga.
O ona afioaga e mai le nuu o Lalomanu ma Moataa ae o lona toalua ia Neil e mai le alalafaga o Samauga i Savaii.
