O se aso matagofie i lona lagi lelei le Aso Toonai, 13 Setema, ua malu foi le taufaanuu ua lau i ula ai ae pou i toa le Peteli o le Atua i le ekalesia i Kokiri, ina ua malu tauee ma tinitauoo i ai le paia lasilasi o le Aufaigaluega a le Atua mai le Mafutaga a Faifeau Samoa i Ueligitone, faapea le Mafutaga a Faifeau o le Sinoti, o sui o ekalesia eseese ma malo valaaulia i uo ma ē masani i le Talalelei faapea aiga o le matagaluega mai soo se tafa o Aotearoa faapea foi ma ē na auvasa mamao mai i Ausetalia.
O le polokalame o le aso:
Taitai o le sauniga lotu: Afioga i le Sea o le Sinoti, Susuga ia Asuelu Mata‘u
Tatalo: Afioga i le Sea mai Aukilani i Matu; le susuga ia Oianata‘i Matalē
Tusi Paia: Susuga ia Alefa Tauma‘oe (Hastings)
Tala faasolopito o le ekalesia i Kokiri mai le 1974 – 2014: Susuga Iosefatu Semi (Failautusi o le Sinoti i Ueligitone) a o le faafeagaiga foi lea o le ekalesia i Kokiri.
O lona toavalu ai foi lea o faifeau na autovaa mai i totonu o le ekalesia talu ona faavae mai le ekalesia Metotisi i Kokiri mai le 1974.
O le mae‘a o le sauniga na faagasolo atu ai loa i le Hall mo posiva a matafale o le ekalesia ma soo se ekalesia faapea le tusiaina o tusi valaaulia. Na oso lava le agaga foai e lafo ma togi maa faatasi e lagolagoina le faamanatuga o le 40 tausaga o le ekalesia Metotisi i Kokiri.
Sa lelei ma matagofie le faagasologa o siva taitasi a le auvalaaulia ona o le lelei saunia o le faaili matagofie a le Autalavou lava o le ekalesia i Kokiri, o loo taitai ai le susuga ia Henry Samia ma lona faletua faapea ma sui o le Autalavou lava a le ekalesia.
E ese foi le mālie eseese o fati felanulanuai ma le ola o le faagasologa a le Fofoga o le Aso na feagai lea ma le afioga ia Polataivao Matagi na fesoasoani i le susuga i le Failautusi a le ekalesia le fetalaiga ia Fata Tifaga.
O i latou na faagaioiga le faamaopoopoga o le tupe o lea aso, o le susuga i le Teutupe a le ekalesia le fetalaiga ia Levaogogo Tiata, le tofa ia Tauanuu Moemālō, Rev. Farani Vaa (Misionare) ma le tamaitai ia Pepe Pio ma ni isi o alo tamaitai e toalua talavou o le ekalesia.
Sosoo atu ma le taumafataga felanulanuai matagofie na tali ai le sua a le mamalu o le auvalaaulia, a o faagasolo mai le faalauina o le aaofoai o lenei faamoemoe tele, na feagai lea ma le susuga i le Failautusi le tofa ia Fata Tifaga.
O i na logo faatutuila ai le faafofogaaga a le aofia a o feagai pea ma le taliga o le sua ma faafofoga foi i lo latou aaofoai ma o le tala faatopetope na maua i lea aso e $144,903.90 ae peitai ina ua toe siakiina le faitau ma faamautuina ai le $158,465.40 le aofai o le aaofoai ona sa toe faaopoopo le isi $7000.00 mai le sauniga mo i latou e 27 na maliliu talu mai le 40 tausaga lea na faataunuuina i le aso na sosoo ai.
E lei faatamala le susuga i le Tausi Matagaluega faapea le Matagaluega i faaaloaloga masani e pei ona faatinoina i le tu ma le aganuu Samoa.
O sua faatamaalii ma palapala a malo aemaise le tatalaina o le malo o measina a Samoa e faafetaia ai le aaofoai o le Sea, Peresetene o le Auso Fealofani faapea susuga uma i faafeagaiga ma ekalesia, uo ma ē masani o le auvalaaulia e pei ona vaganā fetalai i ai le Tofa ia Levaogogo Tiata e fai ma fofoga o le ekalesia ma le susuga ia Iosefatu Semi ma le faletua.
O le fetalaiga ia Lofipo Pemerika na vaganā e fai ma sui o le Sea o le Sinoti, Komiti tumau, le Aufaigaluega paia a le Atua ma le auvalaaulia e faafetaia le Tausi Matagaluega ma le ekalesia i Kokiri i le maualuga o le faaaloalo matagofie lea ua silamio i ai le aofia ma le mamalu o Samoa potopoto.
Na maua le avanoa e faamatala mai ai e le susuga ia Iosefatu Semi le tulaga manuia o lenei faamoemoe i le tali valaau o o tatou tagata e tusa o lo latou faamoemoe. Na ia ta‘ua foi o loo iai isi foai tupe ua lafoina sa‘o lava e tagata na lē mafai ona auai mai i le aso ona o tuatuagia ae na lafo ane lava tupe i totonu o le tusitupe a le ekalesia, ma e le o aofia ai i le $158,465.40 lea. O lona uiga e ova atu lava ma le $160,000 ma ona tupu le tupe o meaalofa mo le Aso Fanau o le ekalesia.
Na toe faaopoopo foi le Tausi Matagaluega e tusa o le tele o galuega sa feagai ma le ekalesia e tusa o le sosooina o le Peteli, le faateleina o le umukuka o le hall ma lona faatotogaina, faapea foi ma le faatauina o le isi fale e tuaoi ma le falesa lea ua mafai ona faaopoopo mai i le faateleina o maota o le ekalesia mo le faafaigofieina pea o ana galuega fai. E iai foi lona talitonuga ua tuumamaina le tau o nei galuega tetele ma le taugata talu ona la galulue mai i lenei tolu tausaga.
O lea e avea ai lenei avanoa e faaoo atu ai le agaga faafetai tele ma le faamalo mai le Susuga i le Tausi Matagaluega ia Iosefatu Semi ma le ekalesia Metotisi i Kokiri i le paia o le Aufaigaluega a le Atua ma le mamalu o ekalesia ma Mafutaga eseese, o uo ma ē masani faapea le loaloa o le auvalaaulia e tusa o lenei foai tele ma le tautua i le finagalo o le Atua, lea ua matou talisapaia faatua eleele.
Faafetai tele i lo outou agaga sa ‘afa e tasi e opogi lo matou faamoemoe. O le upu moni, sa galo nuu i le vaai ma taumatemate faiva o Pa‘usisi pe sina le galu ma tua i fea lenei faamoemoe. A lea ua tali faaaliali le Atua o manuia, e ala i agaga ua ulufaleina e lona alofa e foai, lea ua tini pa‘ō le uto e pei o upu i faiva o vai, ua tau le ‘ai o tapalega ma ua togi pa tau i le ave lenei taumafaiga, talu lo outou alofa tulai e tautua le finagalo o le Atua.
O le tatalo ia lē tuuaunoaina lo outou agalelei, ina ia toe faatutumu atu e le sosia o le Atua ma le lasi o ana faamanuiaga i luga ia te outou uma. O Keriso lava ia na fetalai: “ E sili lava le manuia o le na te foai, nai lo le na te taliaina.”
E momoli atu foi faamanuiaga a le tatou nusipepa i lo outou 40 tausaga Metotisi Kokiri.
