Manu Samoa ma le Olopeleki

E matagofie ni manatu na faaalia e nisi o sui muamua o le Manu Samoa o loo alala ma papaaao i Ausetalia nei ina ua fesiligia e le Samoa Times i so la manatu i le ‘au a le Manu Samoa e taaalo ma le Olopeleki i le tausaga fou mo le taimi muamua i Samoa.

O le susuga Matamua Fainuulelei Pauli Filipo Saena ma le susuga Palemia Alaalatoa o ni sui iloga o le ‘au a le atunuu na taalao mai le vaitau ae lei iloa le Manu i le Ipu o le lalolagi i le 1991.
I lana saunoaga i luga o le leitio FM 89.3 Samoa Sportstar i Sini na faailoa ai e Matamua Filipo Saena le utiuti o tama e suitulaga pe a manunu‘a sui amata, ma o le mafuaaga lea o le ono sailia mai o nisi talafeagai mai fafo e pei o le susuga ia Tim Nanai Williams aemaise le foueki. O se popolega foi ia Saena poo ai sē o le a tulai mai pe a manu‘a Tusi Pisi i le numera sefulu. “O loo iai nai isi alo o Samoa i Europa ma le supa sefuluima e ono silasila ma tagai i ai le Manu Samoa auā se ‘au malosi e fetaui ma le Olopeleki a Niu Sila.

I se saunoaga a le faiaoga a le Manu Samoa ia Stephen Betham na faaalia ai le tuu atu lava i le faitalia a le tama Samoa o loo soifua i fafo e sii ai lona aao ma alu atu i Samoa e taalo mo le Manu pe a manao i ai lona ia lava loto ma le agaga. “O le a matou lē tauanauina ae o le a tuu lava i le lagona ma le lotonuu o le tama.”

Na saunoa foi le loka muamua a le Manu Samoa ia Palemia Alaalatoa o loo aumau i Sini nei, ou te talitonu lava e mafai foi e nai tama o loo iai i le ‘au i le taimi nei ona gafatia lenei taaloga i le talafaasolopito.
O le susuga Palemia o se sui o le aufili a Samoa i le 1986 lea na taalo ma Wales i Apia i le 1986 i le uluai malaga atu a Uelese ma tatala ai avanoa o le Manu i le lalolagi. “O lea foi ua tapena le malaga atu e tapuai la tatou ‘au i lea taimi faamauina o le lakapi faatoa masii atu ai le ‘au malosi a Niu Sila e fetaui ma le Manu Samoa i o tatou eleele.”
Manu Samoa i le 1989