Tusia: Merita Huch
Samoa
E ui e lē o toe iai se aso malolo i Samoa e faamanatu ai le Aso o Fitafita o le Taua (ANZAC day), ae lei faaitiitia ai le oo atu o le toatele e fia maimoaina le Lotu Faamanatu o lea aso tāua i le vaveao o le Aso Tofi na se‘i mavae atu nei.
Faaalia e le Peresetene o le Asosi o Fitafita ua toe taliu mai i le taua le RSA, le Afioga Le Mamea Sefulu Ioane, e telē lava foi le sao o alo o Samoa i tausaga ua mavae i le Taua Muamua o le Lalolagi aemaise le taua i Gallipoli lea na aofia ai nisi o fitafita Samoa i le vaega‘au a Niu Sila ma Ausetalia na tutu faatasi ma Peretania i lea taua tele.
O le toatele o Samoa na i lea taua, sa tautua i lalo o le fitafita a Niu Sila i le itu na tau ai fitafita o tagatānuu o Maori (Maori Batallion) ma e mautinoa ua leai se tasi o toe soifua mai i lenei vaitaimi, peitai o isi tamafanau a Samoa, o alii ma tamaitai na tau i isi taua o le Lalolagi, le Taua Lona Lua, le taua i Korea, le Taua i Vietnam i lalo o le fitafita a Amerika, le Taua i Iraq, Afghanistan ma le taua mulimuli nei foi o Iraq na manatua uma lava i lenei sauniga.
Na faapea foi ona manatua ai Leoleo na tautua ma o loo faaauau pea ona tautua i le Tausiga o le Filemu i lalo o galuega tau puipuiga a Malo Aufaatasi, e pei ona iai leoleo na tautua ma o loo tautua pea i le tausiga o le Filemu i nofoaga e pei o Sudan, Somalia ma Timor i Sasa‘e. O Leoleo o loo tautua i le tausiga o le filemu mo Malo o le Pasefika e pei ona iai le RAMSI – i le atu Solomona.
O le sauniga na faatautaia e le RSA faapea ai le Matagaluega o Leoleo e pei ona iai le savali faaaloalo na auai uma ai i latou ua foi mai i Samoa i le mae‘a ai o tautua faafitafita ma tautua faaleoleo faavaomalo.
O le afioga i le Alii Palemia, le susuga Tuilaepa Sailele Malielegaoi na fofogaina le sao o le Malo o Samoa i lenei sauniga e pei ona ia faafetaia ai le sao o alo uma o Samoa mai lava i le Taua Muamua a le Lalolagi i le sailiga o le saolotoga o tagata lautele o le lalolagi.
O lana faafetai o le lē oo o Samoa i feeseeseaiga faapea e pei ona vaaia i le tele o atunuu e oo lava i ona tuaoi o loo tulai mai ai pulega ua lē talafeagai ma faiga
faatemokarasi ua faapea ona ‘ae‘ae ai nei Samoa.
O le faafetai a le Hai-Komesina o Ausetalia, Dr Stephen Henningham, o Samoa uma i totonu o galuega e tausi ai le filemu e pei ona vaaia i atunuu o Aferika ma Asia faapea totonu lava o le Pasefika.
Mo alo o Samoa sa tautua i Iraq ma Afghanistan, na ta‘ua e le alii Hai-Komesina, o Samoa ua sili atu i le to‘a 20 ona tagatānuu ua maliliu i ia taua, ae sa tau mo le vaega‘au a Niu Sila faapea foi i vaega‘au a Amerika.
O le faamatalaga a lea taitai o Ausetalia – e tāua tele le sao o tagata Samoa i le puipuiga o le filemu o le lalolagi, ae lē gata i lea o le faatumauina o le filemu ma le ola saogalemu i totonu lava o Samoa.
O galuega laveai ua feagai ai ma malu o le Malo i Samoa nei e pei ona vaaia i taimi o faalavelave faafuasei na faapea foi ona manatuaina.
Faaalia e le alii Peresetene o le RSA i Samoa, le Afioga Le Mamea Sefulu Ioane, e iai lava le manaoga ina ia toe faafoi mai le aso malolo o le ANZAC i le kalena o aso malolo a Samoa talu ai o se tasi lenei o vaega tāua i le talafaasolopito o le atunuu.
