O le vaiaso talu ai na faamanatu ai i Sini Ausetalia le tausaga talu ona maliliu nisi o mātua e pele i le fanau mai Samoa, Niu Sila ma Ausetalia nei le susuga ia Arthur Helg 93 tausaga na maliu i le aso 8 o Tesema 2013 ae maliu atu le tina ia Silila Sione Teariki Helg i le aso 5 o Ianuari 2014.
O le valevale alofa o le fanau ma fanau a fanau aemaise le paia ma le mamalu o aiga na lua na autovaa mai mo le maa faamanatu na matagofie ai le aso.
Na saunoa le susuga ia Ps Joey Helg i le sauniga lotu na faia i le fanuatanu lava i Woronora i Sutherland Niu Sau Uelese, “O le viiga ma le faafetai e momoli i le Atua auā nei matua matagofie ma le faagalogata e lē gata i le fanau aemaise le aiga atoa, ekalesia ma nuu na tautua ai i Samoa, Niu Sila ma Ausetalia.”
Na faatasi uma le aiga ma uo ma ē masani i lenei mau olaola i le aogā o fautuaga ma apoapoaiga a nai mātua a o soifua i le fanau ma le tupulaga laiti o loo soifua nei.
O le sui o le aiga o le tna ia Silila le Faifeau ia Maliolioao Ainuu Sekai ma le faletua ia Ualesi, na saunoa faalaeiau mo le fanau ma le aofia e faamafanafana ma faamalosi i suli uma o Arthur ma Silila ia lototetele ma faaauau galuega lelei a mātua ua tuua le mafutaga.”
“E lē o se aso lenei o le faanoanoa ae o le aso e fiafia ma faamanatu ai le soifua auauna o nai outou mātua.” Na ia faamanuia foi i le fanau ma fanau aemaise sui o aiga na lua sa potopoto ai.
O le Bankstown Bowling Club na valaaulia ai le paia ma le mamalu na auai mo se taumafataga mamamfa na saunia e le fanau aemaise faafiafiaga e aualofa ai mo Arthur ma Silila na saunia e fanau a fanau.
O le susuga ia Fritz Helg poo DJ Ezy e lauiloa ai i Sini sa avea ma pule o le tausamaaga ae o le tuafafine i Ramona Helg mai Niu Sila na saunoa e faafeiloai le paia ma le mamalu na auai.
Sa auai mai foi i Niu Sila le susuga ia Seiuli Jerry Helg ma le faletua ai Suzie ma le fanau vaganā ai le susuga a Ps Edmund Helg ma Lani mai Amerika Samoa na lē mafai ona auai mai.
O faafiafiaga na sosoo ai na faalogoina ai (tribute) musika a Elvis Presley, Siva Samoa a nai alo talavou e faailoa ai Siva e fiafia i ai o latou mātua o mātua (grandparents) ae o le taualuga na saasaa ai le tamaitai talavou o Penina Kamu (10) mai Samoa na malaga faapitoa mai lava e fai ma sui o aiga o loo tagi mai ala.
