E faigata ona aveesea i manatu ma mafaufau, auā e fagufagu pea galuega ua tino mai ma le saili malo a o lei oo mai i ai le valaau a le Matai.
O le susuga ia Papalii Dr Peter Taouma ua loa lana tautua e lē gata i Samoa ae o totonu i Niu Sila nei i lona tomai faapolofesa i lana tautua o se fomai o oloa poo nifo (tulou).
Peitai o se tamalii foi sa uluai faavaeina ma lona faletua ia Janice Taouma le Aoga Faasamoa i Richmond Rd i Ponsoby i le tausaga 1984, ae lē gata i lea o le aoga faataitai muamua lava lea i totonu o Niu Sila.
O le tele o tausaga e fai ai sailiga tupe a le komiti ma mātua faapea faiaoga auā nisi o vaega e fia faaleleia i totonu o le aoga, a o soifua mai lenei tamā.
Ae peitai ua lē ogatasi le futia ma le umele, i fuafuaga fai a le aoga ma le pule faasoifua o le Atua i le soifua galue o Papalii Dr Peter Taouma, ua mafua ai ona motusia le mafutaga i galuega faatino i totonu o le aoga ma le komuniti a Samoa.
Ae o loo faaauau pea e le faletua ia Janice Taouma ma le komiti faapea mātua ma faiaoga i alafua i totonu o le aoga e pei ona sau ai le faatinoina o mea e fai, e pei o sailiga tupe auā le faaleleia o le faleaoga aemaise o le fesoasoani i mātua ua faigata ona totogi pili o le fanau.
O le afiafi o le Aso Lulu ua mavae, 14 o Oketopa sa tatalaina aloaia ai se trust fou i totonu o lenei Aoga Amata ua faaigoaina o le Papalii Dr Peter Taouma Trust.
O lenei fuafuaga sa filifili toto‘a i ai le Komiti Faafoe ina ia manatua ai pea lea tamalii o le atunuu sa uluai faavaeina le aoga muamua Aoga Faataitai i totonu o Niu Sila.
Ma o le po foi lea sa faia ai ma se sailiga tupe auā lava le fesoasoani i mea e fai i totonu o le aoga aemaise o le faaleleia o nisi vaega o le faleaoga, ua faaletonu, auā o nei fale ua manaomia se toe faafou, ona ia lelei ma atoatoa le soifua maloloina o le fanau aemaise o galuega faatino a faiaoga ma mātua.
E lē o iai se seleni o maua mai i le malo e faatino ai nei vaega uma, ae ua tagi lava i lima o mātua ma faiaoga faapea le komiti faafoe sailiga tupe.
E tele kamupani sa tuu atu lo latou tauau e lagolago ai i lea faamoemoe, e pei ona fesoasoani i ai le kamupani o le MENA, Molida Shipping Agency, Eveni Pacific, Levi Plumping (LP), Shop Samoa, MAX, Jacks Wholesale Meats, NZ Pacific, Richie Builaders Ltd, XOX Pacific Ltd (Hot Samoan Boys Chilli Sauce), Max Sportwear, Kia Ora Sea Food, Fresh Tv Show, UP Café.
Ae ua lē gata i lea o le maualuga ma le matagofie o lea afiafi o le tali valaau o aiga ma mātua o loo aooga o latou alo i totonu o le aoga, aemaise ai o uo ma ē masani sa taupati atu e apogi le faamoemoe.
O le susuga ia Falaniko Tominiko sa fai ma sui o le Komiti Faafoe ma mātua e saunoa faafetai i le mamalu o le atunuu aemaise o faauluuluga ma sui o kamupani taitasi sa auai i lea po.
O le Komiti Faafoe o loo tulai mai ai le Faletua ia Duane Stanley i le taitaifono (Chairman) vaavaalua ma le susuga ia Falaniko Tominiko, o le faletua ia Janice Taouma (Manager) Shahranee Faavae (secretary) Ene Tapusoa, Susana Talani o loo galue i le Tagata Pasefika, ma Rasmus Pereira o le Shop Samoa.
O le ola finau ma le saili malo o loo maitauina ai pea le agai i luma o le aoga aemaise ai o le mausali o ona faavae e pei ona amata mai ai le aoga.
