Na faamanava ele Atua galuega ale tamā ia Alolevave Tovio Mauga mai lenei lalolagi ile aso 19 o Setema ile tausaga 2014, ma ole aso foi lea na faafaigata ai e lona aiga atoa, i ona uso ma ona tuafāfine oloo aumau i isi atunuu ole lalolagi, ae faapea i lona toalua pele ia Salote male fanau ona talia le matuitui ole tiga ua oo iai le aiga.
E faagalogata ona uiga lelei, auā ose tamā e finau malosi i mea e manuia ai le tina male fanau aemaise ai ose tagata e osiaiga lelei. E malaga solo i atunuu oloo iai ona uso ma tuafāfine e asiasi iai, o se tagata foi e fai ekalesia lelei auā sa mulimulitai lava i ona tuaa a‘o avea ma fesoasoani ole Ekalesia Katoliko.
O ona uiga agamalu male faaaloalo i soo se tagata e lē mafai ona avaeesea ma totonu ole lotoifale ole aiga ma e manatua pea i taimi uma, ma ua avea lea ma faataitaiga lelei i ona uso ma ona tuafāfine faapea ma lona aiga atoa.
O lona soifuaga atoa o totonu lava ole afioaga o Mulivai Safata mai lava i lona laititi seia oo lava ina matua, ma ole mafuaga foi lea e soifua maloloina lelei ai lona tino e leai ni gasegase e maua ai ona e toaga e galue, ae peitai o lona malaga mai i Niu Sila ile tausaga 2014 na faafuasei ai ona maliu.
Ole Aso Tofi ua mavae, 13 o Oketopa na toe fuifui faatasi ai lupe sa vao eseese i totonu o lenei aiga, ile tatalaina o le maa faamanatu ole tamā ia Alolevave Tovio Mauga i Magele.
O ona uso ma tuafāfine oloo aumau i Hawaii, Amerika, ma Alaska ae faapea foi i lona aiga atoa, ma aiganalua na auai uma ile molimauina o lenei maa faamanatu ile fanuatanu i Magele.
Ole afioga ia Patele Felise Lemi na ia taitaiina le sauniga o lenei faamoemoe.
Ole saunoaga a Patele na autu iai lenei sauniga, o lenei maa, ia avea ose maa e faamanatu ma fafagu ai pea galuega lelei a lenei tamā a‘o soifua i totonu ole aiga.
Ma ose talalelei foi lea e ao i tagata lautele ole aiga ona outou o atu ma molimau atu lenei talalelei i uiga lelei o lenei tamā e pei ona patipatia le tatalaina o lona maa faamanatu. Ole alii o Niko Mauga le atalii matua o le toeaina na ia ootiina le lipine ma lauina upu o faamanuiaga ma saafiafiga oloo tusia i luga o lenei maa, ae ole susuga ia Fata Iosefo, ose tasi o uso laititi o Alolevave Tovio sa fai ma fofoga ole aso ile fanuatanu e momoli le agaga faafetai ia Patele e tusa ai male galuega fita sa iai, ae faapea foi ile hall i Magele sa faaiu iai polokalame ole aso e fai ai le taligasua ma faaaloaloga.
Ile molimau ale fofoga ole aso le susuga ia Fata Iosefo ile taimi ole taumafataga, e lē mafai ona galo lona uso ia i latou uma, ona ose tagata e tautala sa‘o ma sa‘o ana faaiugafai i lona aiga, ae a nofo nofo foi i Niu Sila ua fia alu atu i Hawaii ona vili atu lea e fia tafao atu, ona latou taufai pulupululima faatasi lea ma ona uso ma tuafāfine e totogi lona pasese e alu atu ai, ma ole mafuaaga foi lea e malaga mamao mai ai lava i lenei faamoemoe ona e pele i o latou loto lo latou uso matua.
