Manatu o le Faatonu – Mataupu lagalagā ole Fono muamua ale Palemene

E ui ile naunau atu ole atunuu e fia malamalama ile aofaiga ole tupe oloo totogi ai le lisi ole vaalele ale Iceland Air oloo faaaogāina nei ele Samoa Airways mo ana faigamalaga faavaomalo, peitai, oloo faauliuli to pea le alii Minisita ole Samoa Airways, le afioga ia Lautafi Purcell, e lē mafai ona faalauiloaina mai faalauaitele le tau ole lisi.

Ole alii Minisita lava foi na ia saunoa ile autusitala, ole afioga ile alii Palemia ole a ia faalauiloaina aloaia le tau ole lisi ole vaalele, pe a oo ile aso e faalauiloa aloaia ai le tautua ale Samoa Airways. I lipoti na faasalalauina e nisi o nusipepa na faailoa ai, e limaselau afe tala Amerika le lisi ole vaalele ile vaiaso e tasi.

Ole fonotaga muamua ale Palemene o lenei tausaga na talanoaina ai le tala faaopoopo ole tupe, na toe fesiligia ai foi le Minisita e nisi o faipule, ile tau ole lisi peitai, na tumau pea le tali ale alii Minisita e lē mafai ona faalauiloaina le tau ole lisi ole vaalele, ona o tuutuuga ia na faia ma le kamupani vaalele ale Iceland. Ete talitonu ile tali ale Minisita?

Mo a’u lava ia, e faigata ona ou talitonu ile tali ale alii Minisita, ona e ese lana tala na fai mai muamua ina ua uluai fesiligia, lea na ia saunoa mai ai, ole a faailoa ele Palemia le tau ole lisi pe a faalauiloa le tautua ale vaalele, ese foi le tali lea ua fai mai ile taimi lenei, pe ole mea ea, na tali mai le alii minisita muamua, e aunoa ma sona silafia e lē mafai ona faalauiloa le tau ole lisi i lalo ole maliega ma le Iceland Air?

Afai ole tulaga lea, o lona uiga la, e fai lava si fai autago o galuega ale alii minisita i lena taimi.

Talu ai ole Samoa Airways ole vaalele o Samoa, ole vaalele ale atunuu e lē o faatupeina ele Minisita ma le Palemia, o tupe ale Malo, poo tupe a tagata lautele oloo faatupe ai le vaalele, e tatau foi la ona iloa e tagata lautele le totogi ole lisi. Peitai, e peiseai na ona faaaogā o faaupuga nei, ole vaalele ale atunuu ina ia tosina atu ai loto o tagata Samoa e faaaogā le Samoa Airways i faigamalaga, ae leai se feau a tagata lautele e iloa ai ma malamalama ile totogi ole lisi ole vaalele?

E ‘asa le faiva ae le ‘asa le masalo, e iai foi le taofi e mafua ona musu le alii Minisita ma le Palemia e faailoa le tau ole lisi ole vaalele, ona ole taofiofi i faitioga ma manatu o tagata e faaalia, pe a faalauiloa le tau sa’o ole lisi ole vaalele.

Afai e moni le masaloga, o lona uiga e lē ose tupe itiiti oloo totogi ele Malo o Samoa mo le lisiina ole vaalele. A mavae le uluai 12 masina ole lisi ona toe faafou lea, pe afai e sologa manuia taumafaiga ma le faafoeina ole vaa.

E ono taugofie ifo le lisi ole a totogi ele Malo.

E iai lo’u talitonuga faato’a faailoa ai lea ole totogi ole lisi ole vaalele. Ole tau ole vaalele fou ituaiga ole Boeing 737 e lata ile fa selau miliona tala.

O lea lava e laumanu’ia tupe o carbon credits oloo faatau atu ele malo e oo atu ile limaselau miliona tala.

E lava lelei ai lava se tau ose tatou vaalele fou. Ia fai atu ai foi.

Ole isi mataupu na tautalagia ile fono muamua ale Palemene, ole tau ole falepuipui fou i Tanumalala, lea na faailoa ele Minisita o Falepuipui, ua oo atu ile 20miliona tala, ua 10 miliona tala ua sili atu ai nai lo le tau lea na tuuina atu ai le tauofoga manumalo ile konekalate ale uso ole alii minisita.

E lua mafuaaga na faaalia ele Palemia ma le minisita ua mafua ai ona siitia le tau ole galuega.

Ole mafuaaga na ta’ua ele Palemia ole nofoaga oloo iai le falepuipui e tele ile papa, e tele se tupe na alu e tu’i ai le papa. Ae na ta’ua ele afioga ile minisita, o totoga ole falepuipui e taugata, faatasi ai ma le pa e siomia ai le falepuipui e taugata foi.

O lona uiga e lei silafia le tau o nei mea ile taimi na faatulaga ai tauofoga? Sa iai le manatu o tau o mea uma nei ua faamalau mai ele minisita ma le Palemia, e iai uma i totonu ole tau aofai na faatulaga ai tauofoga.

A leitioa foi se sa’i ma faitio le atunuu, ona o mea sapasapa faapenei, aemaise ai, ole konekalate lea na manumalo ile tauofoga ole uso ole alii minisita. Sa tautalagia foi lea tulaga ma faitio le toatele ile konekalate na malo ile tauofoga, o lona uiga na fai lava ma le mautinoa le ofo ale konekalate na malo, e tauofo ile sefulu miliona, ose tau taugofie ina ia maua ai e latou le galuega, ae ua uma lava ona fai le peleni e toe faaopoopo mulimuli atu le tupe e faatino ai le galuega e pei la ona iai le tau fou ole galuega lea ua faalauiloa mai nei e lua sefulu miliona tala.

E iai la’u valoaga e uma ane le galuega ua lata ile 30 miliona tala le tau atoa ole falepuipui fou.

Ole a faaiu atu se manatu ile saunoaga ale Palemia, na ia faailoa ai ua ia silafia uma tagata oloo faia faasalalauga i luga o fesootaiga televavave, e pei ole OLP.

Na ia ta’ua foi ua iai lona popolega ile saogalemu ole ola o latou nei, ina nei afaina ona e iai tagata o ona aiga e lē lelei mafaufau, o tagata na ua agai atu nei e saili le auvaega lea e tutu mai tua o faasalalauga taufaaleaga, e pei ona faia ele OLP.

Na manino foi ile saunoaga ale Palemia, o loia uma lava tagata nei oloo faia nei faasalalauga.

E lē taumate le pulunaunau ole Palemia ina ia pasia le tulafono fou lea ua tapena nei, ina ia mafai ai ona faia ni moliaga faasolitulafono faasaga ia i latou nei.

Ae ole aotelega o upu na lafo ele alii Palemia, ose taufaamata’u ia i latou oloo faia nei faasalalauga, faapea foi o latou aiga. Tatou tatalo mo Samoa ina ia tumau lona filemu.