Ua faatāua ai ele pulega ole Ofisa Palota a Samoa, le sao o tupulaga talavou i lana polokalame ole 2018. Ole lua ai lenei o tausaga talu ona faagasolo le plokalame faalauiloa a le Ofisa Palota. Ile tausaga lenei na valaaulia mai ai autalavou a le Ekalesia Metotisi i Matafele ma le EFKS mai Vaitele fou, mo le faafinauga ole mataupu, faatatau ile tatau ona faatulafonoina o lou palota.
Ile itu o lagolagoina le faatulafonoina ole palota, na mafuli la latou talanoa, ile tāua ole sao ole tagata ma lana aiātatau ia iloa le tāua. Peitai na finau le autalavo u le EFKS a Vaitele, ile tāua ole aiātatau ale tagata, e pule ai pe palota pe leai. E pei ona faia ele tele o atunuu Temokalasi, oloo tuu lava ile faitalia ale tagata pe palota.
Ole tulaga o iai nei, Samoa, e faamalosia lou lesitala, ae pule lava oe pe ete palota pe leai. ile finauga i luga o lauga ma manatu faaalia mai kolisi e valu na filifili mai Upolu ma le fa mai le motu tele i Savaii, e maeu foi sau sau a alii ma tamaitai ole Vasega 13.
Ole autu ole lauga, pe iai se suiga o faiga palota ile faaaoga o tekonolosi faaona po nei. Na sola le Kolisi o Savaii i Sisifo mai Sagone, ma le manumalo ole lauga, le alii talavou ole vasega 13 ia Vaeagi Fualau. Na talanoa le pule aoga ia Tapua’i, na filifili le tama e lelei lona leo ma lana lafo lafo.
Ole faalauiloaina lea o galuega fai a le ofisa faipalota, na faia ile faletele o tulisi ile eleele fou. Na saunoa aloaia ai le afioga ile Minisita o faamasinoga, Faaolasa Katopau Ainuu “ile tāua ole galuega a le ofisa o faigapalota, ma faafetaia lo latou sao i galuega faalauiloa, ile tausaga lona lua lenei.
“Ole ala lea ua fili ai le sini, Unaia ole auia o tupulaga talavou ile faigapalota.”
“Ole Manulauti, ia talisapaia e tatou tagata, ma tupulaga le faatāua o lau aiātatau, e filifili ai taitai e ala ile palota”. “Faamuamua tupulaga talavou ma fanau, ina ia totō io latou loto le tāua ole faia ole filifiliga sa’o ma le faamaoni”.
O nei polokalame faalauiloa ale ofisa palota, na saunoa iai pule sili, Faimalomatumua Mathew Lemisio, ua amata foi ona tilotilo e ave nei polokalame i Savaii ile tausaga fou.
Na ia ta’ua foi ole faanoanoaga oloo iai ona ole tele o talavou e lē o palota. Ae oloo faitau ma faalogologo ile tele o faitioga a tagata i taitai ole atunuu, ae latou te lē o faatāua le avanoa, lenei e ala i faigapalota.
Ole mafuaaga lea na suia ai le sini o faalauiloa i lenei tausaga, ‘Ia unaia talavou e palota’. E talitonu le Minisita, ole a iai se sao ole polokalame faasolo lenei ile agai i luma, ae ole talanoa ale alii talavou na manumalo mai le kolisi o Savaii Sisifo, “e lasi foi faafitauli e tulai mai ile faaaogāina o masini ma tekonolosi faaonapo nei e faatino ai faigapalota.
“Auā e faamoemoe lava ile faamaoni ole aufaigaluega, ma ia fautuaina tagata ole ofisa e fafagaina computers, ae ia faamaoni ma sa’osa’o mea e fafaga ai. Ua toe faamanatu mai, e tatau ona molia le tagata e lei lesitalaina lona suafa ile lola ole aupalota.
