E toavalu matai o Tanugamanono ua mae‘a ona talia le latou tautinoga o le gau mativa i le faamasinoga ma ua lē toe iai so latou aafiaga i le totogiina o le taui tupe e 833 afe tala i le aiga o Faumuina Tutuila.
Ua na o le toatasi le matai le afioga Tupuola Afa Lesa ua feagai nei ma le totogiina o le taui faapea le isi matai ua nofomau i Niu Sila ae ua mae‘a ona soalaupule ma le loia a le aiga o Faumuina Tutuila ni maliega mo le tuu mai foi o lona sao i le totogiina o le seleni.
O lea matai o le susuga Palaialii Tuvale na taofia lona toe foi i Niu Sila ina ua malaga mai i Samoa i se faamasinoga tau fanua ina ua maua ane o ia le isi o loo iai le suafa ia i latou na tuua‘ia e avea ai ma sui o Alii ma Faipule o Tanugamanono.
O Tupuola Afa Lesa o se faipisinisi ma e iai foi ana aseta poo meatotino, peitai ona ua na o ia o loo alala i Samoa ua totoe mai ia i latou ua faailoa le gau mativa sa ia toe tatalo ai i le faamasinoga e toe iloilo le totogiina o le taui tupe. Sa faailoa e lana loia i le faamasinoga e tele isi alatupe e faaalu ai i ai seleni a Tupuola Afa ma e na o le $500 tala e mafai ona ia totogiina i le masina.
O le talosaga lenei ina ua fofogaina i le faamasinoga i le Aso Tofi ua mavae, 24 o Setema 2015, na tuuina atu ai e Tupuola ma lana loia ma le lisi o suafa o matai uma o Tanugamanono. O i latou o loo alala i Samoa, i latou ua maliliu ma matai ua aumau ma nonofo i fafo atu o Samoa.
I taualumaga o le mataupu na faailoa ai e le afioga i le Faamasino Lesatele Rapi Vaai, o i latou na iai suafa i le mataupu e pei ona sa faatutu i ai le tagi a le aiga o Faumuina Tutuila, ua na o ni sui o le nuu faapea Alii ma Faipule o Tanugamanono na faasaga i ai le mataupu.
Na saunoa le alii faamasino e mafai ona tuuina atu uma suafa o matai o le nuu ona silasila lea o le faamasinoga i le tulaga o le aumai o se latou lagolago i le totogiina o le taui tupe. O le vaega tonu lea ua mafua ai ona toe tolo le mataupu i le aso 23 o Oketopa 2015 ina ia maua ai le avanoa o Tupuola Afa Lesa ma lana loia e logo matai o le nuu e tusa o le finagalo o le faamasinoga.
O le tautinoga o le gau mativa ua faia e matai e toavalu sa aafia i le mataupu na ioeina e le faamasinoga le mau a le loia a le aiga o Faumuina i le leai o se agaga usitai o le nuu e usitaia le faaiuga a le faamasinoga.
O le faavae o lea finauga a le itu a le aiga ona o Aukuso o le tausaga ua mavae 2015 na aumai ai le faaiuga a le faamasinoga na faatulaga mai ai aofaiga o tupe e totogi i le masina seia oo ina mae‘a le taui.
Sa aumai ai foi ma se vaega o le faaiuga i le tatau ona galulue faatasi le nuu e faia ni sailiga tupe e totogi ai le taui. Peitai o Aukuso 2014 le faaiuga lea ae o le tuanai le ono masina ae aliali mai le tuai maua o seleni i nisi o masina.
O le taimi nei e nao le $35,000 le tupe ua totogi o le $833,000. E na o le tasi lava le totogi o le taui na iai le sao o i latou uma sa faasaga i ai le tagi ma avea ma sui o le nuu, ae na oo mai i isi masina o le tausaga nei e oo mai ia Mati ua ese le auala ua maua atu ai isi vaega o le tupe e maua i masina.
O le tasi o masina na oo ai le tupe pa‘ū ua lē maua atu i le $28,000. O le seleni atoa lea na totogi e se tasi o tamalii o loo iai lona faamoemoe e tauva i le palota o le tausaga fou. Na faailoa e le loia a le aiga le tulaga lea i luma o le faamasinoga.
Na faailoa e le tamaitai loia o Ruby Drake, e matuā leai lava se faamoemoe o le nuu e totogi ia uma le taui ma o se lē faaaloalo ma le a‘itui lea i le mamalu o faaiuga a le faamasinoga.
Peitai na faaalia e le afioga Lesatele Rapi e poo le ā lava le tulaga e oo i ai le mataupu e lē mafai ona o ese ai le nuu o Tanugamanono i le totogiina o le taui.
O matai e toavalu ua faamaonia le latou tautinoga o le gau mativa (declaration of bankruptcy) e alala uma i Samoa. O isi matai e toalua na aofia ai ia i latou na faasaga i ai le tagi ua maliliu.
